ZKIZ Archives


羅康瑞「連累」襟細佬

2013-05-16  NM
 
 

 

被釘子戶搞到周身傷的瑞房(272),不單令羅康瑞頭痕,仲連累埋佢老婆朱玲玲嘅妹夫洪錦標。何解?原來洪錦標受上海姑爺「關照」,其創立嘅對沖基金「永靈通」,係○八年四月成立Trophy Property Fund,並投資逾十億銀俾瑞房去發展五個地盤嘅「新天地」項目,年期七年,個fund有約九億銀係嚟自美國機構投資者,當中仲包括美國教師養老金。

如今姑爺的地盤俾釘子戶搞到郁唔到,個fund的價值就蒸發咗一半,洪錦標為向客仔交代,唯有度橋搞重組,首先係將重慶、武漢等四個地盤嘅權益歸還俾瑞房,寄望上海太平橋項目發展及出售後,可以攞番七成半錢;不過,若然投資年期不變,就得番兩年便到期,得唔得真係要睇彩數。如果呢條橋行得通的話,項目就會由永靈通分拆出去,由資深地產界人士開間全新公司去搞咁話。呢次重組由姑爺用開的TAN-EU Capital(陳億資本)去搞,兩年前瑞安建業嗰隻四億美金的「So Tan中國房地產2011」,就正正係由佢管理,公司老闆Rachel Renucci-Tan,以前喺麥格理睇歐洲房產投資。洪錦標採取「局部」棄船政策,咁各位瑞房小股東又使唔使諗諗?

Give me a break銀行飯堂夠矜貴

喺中環搵食艱難,去排隊買盒飯,一來一回已經夠鐘做嘢。好似滙豐銀行就夠醒,喺總行二十八樓開設飯堂,早餐十零廿蚊份,平過翠華多多聲。不過佢最出名嘅係個lunch buffet,四十五蚊位,有齊沙律、湯、粉麵、糖水任食,每日主菜各有特色,最多人喜歡嘅係印度咖喱,據聞唔少平日出開去食「米芝蓮」嘅高層,逢週四都留番喺飯堂食咖喱。呢個平價buffet只限員工,外人不得擅闖。而一到放工時間,飯堂就會化身酒吧,等員工happy hour,小宗見到有齊各款啤酒,仲有大大個紅酒櫃,一杯Mulled Wine都係四十五蚊。一名Banker豎起手指公,話飯堂嘅signature dishes,雞翼同pizza都幾好味!喺滙豐附近嘅上海商業銀行,亦有御用上海廚煮飯,不過只款待高層,而家上商大廈拆咗重建,就無呢支歌仔唱!各位老闆想員工賣命,不妨祭祭佢哋嘅五臟廟先!

郭炳湘:我無鬱躁!

新地前主席郭炳湘喺上個禮拜,睇到敝刊欄目《壹些事壹些情》「躁狂抑鬱重生記」之後好大反應,對小宗說:「我無患狂躁抑鬱!」小宗記得幾年前,新地爭產案爆發,細佬同阿媽一方嘅法律文件就披露郭炳湘患上躁狂抑鬱,阿媽同細佬仲逼佢食藥睇醫生,郭炳湘如此在意,原來爭產單嘢仍未了,佢同兩個細佬喺列支敦士登法院仲有官司打緊,就係關於阿媽鄺肖卿到底有無權去改變郭氏家族基金的分配,病可以醫好,但破鏡就難以重圓啦。

銀河證券水盡鵝飛

銀河證券本週二截飛,成為今年為止集資額第二大的新股;作為內地收入第六大證券商的銀河證券,大股東係財政部及匯金,引來二十一間投資銀行包銷,就好似「太公分豬肉」咁,中石化、中人壽等,亦入飛捧場。 除了有阿爺撐,銀河證券的賣點,是證券經紀佣金收入冠絕同行,市場憧憬內地重啟IPO,A股有得升,到時銀河證券就最受惠。諗到咁好,小宗當然要北上睇睇!但小宗去嘅深圳三間分行,發現每間都水盡鵝飛,散戶三、四個。位於國通大廈的分行,職員遲小姐說好景時,整間證券行坐滿人,連會議室都要變成交易房,但現在一日都無十個客。其他證券行同樣缺人氣。鬼咩,A股自○七年六千多點高位下插,便一蹶不振,多年來又有民企爆煲,企業造假,就算阿爺點出招刺激個市,散戶都唔肯落疊。小宗同內地散戶傾過偈,佢哋對個市未來都不抱希望。抽到飛嘅投資者,宜短炒不宜長揸!

金牙大狀講嘢

遞招股書作測試雍澄軒單嘢,證監明剃超人李眼眉,(真係證監而非只係收柯打?)口水界多作深層次解讀,甚至有人認為此乃阿爺撐689之舉(咁解讀法是否深層次過頭,另議)。不過,證監之所以出手,關鍵在拆售雍澄軒係推銷集體投資計劃;既為集體投資就要證監批以保障公眾利益;證監未批而夾硬應市,公眾冇保障,乃係違法。既然關鍵係先斬後奏,未得證監批准而推雍澄軒出市場。咁即係話超人李大可以依正手續嚟做,學得新股上市咁,整番份夠分量嘅招股書遞入去,理應就可以過關矣。在超人李嚟講,整份招股書又有幾難啫?當然整咗份招股書,最後都仲要證監批。若果真係阿爺要郁佢,即使有份招股書,你估證監又敢唔敢批呢?故此若要檢驗口水界之深層次解讀是否成立,超人李實應遞份招股書入去,睇吓有乜結果。起碼都有個知字吖,係咪?


PermaLink: https://articles.zkiz.com/?id=55588

Next Page

ZKIZ Archives @ 2019