📖 ZKIZ Archives

經濟分析乞人憎？ 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130416/18229084

碼頭工人罷工一事，若曠日持久，對各方面都唔係好事。左丁山上星期一、二（四月八日、九日）寫碼頭罷工與航運，有人鬧左丁山冇良心，不同情工人，其實左丁山只係講事實，睇數據啫，不含價值判斷，咁都唔得！假假地係經濟學畢業生，左丁山常以經濟理論出發，根據找得到嘅數字數據做分析，然後下結論，不及情感情緒。西方早已有人罵經濟學家冷酷無情，經濟學係dismal science「淒黯科學」。大家到三藩市旅行，不妨到唐人街附近嘅美國銀行大廈（電影衝天大火災現場景），大廈外有一個幾大嘅心形雕像，心形塗上黑色，即係黑心啦，銀行外擺個大黑心？攞景、贈興還是黑色幽默？以前左丁山在三藩市問過嚇，得到嘅答案係：「銀行家不能以情感辦事。」
一位讀者Lau寫電郵嚟罵左丁山冇良心：
「我唔係做運輸業但我知香港碼頭已經係全世界數一數二收費貴的碼頭，佢收咁貴都咁多人來上落貨，你估係貪香港碼頭上落貨服務好又或是地理環境好？香港勝在稅率低，手續簡單如此而已，雖然你可能只寫事實出來，但在我這個長期讀者看來很不舒服，不需要你贊成罷工，但請也不要在此刻碼頭工人還在罷工時擺出一副學者口吻，評論罷工的成功率，好嗎？」
香港大學經濟學教授王於漸叻過左丁山好多，佢又點講呢？「港大經濟系講座教授王於漸昨在一項公開活動後指出，碼頭工潮若持續一年，船公司就會改到深圳或蛇口碼頭，令香港的生意一去不返，他笑言行業若消失，倒有助解決特首的住宅用地短缺問題，碼頭佔地若改作住宅用途，可以馬上解決土地供應難題，可改做公屋或私人住宅用地。」（四月十日《明報》A6版），《蘋果日報》（四月十日評論版）訪問練乙錚教授，佢又咁講：「根據數學模型，勞動邊際收益的數學模型（marginal revenue product of labour）可得出工人的實質工資水平（wage rate）。但今次碼頭個案是否合乎數學模型，我暫時不知道，因此我不會輕易說支持工人，或不支持資方。當然我同情工人的處境。」
王練兩位係香港一流學者，非泛泛之輩，大家睇社會問題，不妨多面睇。


左丁山
PermaLink: https://articles.zkiz.com/?id=54727
Next Page
ZKIZ Archives @ 2019