收到兩位讀者電郵，一位船務公司營銷經理Ｃ小姐話佢地集團每星期有六隻船經過香港，最近因碼頭罷工，已有一隻船取消經過香港上貨。事實上，珠三角貨物運往歐洲，可通過深圳蛇口，毋須來港，Ｃ小姐話佢地現在嘅華南業務只有大約兩成係由葵涌貨櫃碼頭處理嘅啫，假如罷工持續，呢個份額會更少。如果係咁就對香港就業量完全冇好處咯，左丁山以前有位朋友做Ｃ小姐類似職位（shipping manager），後來因為公司的貨運經由深圳辦公室處理，佢又唔肯到深圳返工，結果要提早退休，轉行。
另一位讀者Ｋ住在上水，佢話：「你好，本人乃《蘋果日報》讀者，習慣每天打開報紙先看『名采』後看Ａ版，所以經常會讀到閣下的專欄『GG細語』。
對閣下近來撰文的立場與觀點，如我沒理解錯誤，先生非常反對政府的『限奶令』，反對取消一簽多行，認為大陸『自由行』對香港有益無害，支持擴大容許『自由行』的內地城市。
我不知道先生是否從商，有沒有持有大量某連鎖店的股份，或者甚至是某藥房的東主等。但從文章字裏行間看出先生的政商朋友不少，可能這令先生的立場往往站在商家角度，而且我希望先生不是住在港鐵東線沿線一帶，或經常乘港鐵東線（火車）出入，因為可能會令你有另一番看法。」
首先多謝讀者捧場，左丁山冇錯反對「限奶令」，反對撤消一簽多行，反對限制內地人民之旅行自由。可惜呢，自己冇買過任何店舖，唔係開藥房，亦無某連鎖店或任何零售行業公司嘅股票。讀者講上水火車站之擠逼混亂情況，當然係實情，但香港不能因噎廢食，上水火車站之秩序混亂，要鬧食環署、港鐵及香港警察扮懶蟲，管理不善，正如巴黎羅浮宮之保安做得太差，任由竊賊橫行，搞到職員罷工，停開羅浮宮咁笑話，但巴黎唔通因為咁，唔俾遊客參觀羅浮宮咩？香港特區政府依家話要講正能量就應該諗辦法疏導內地遊客，例如在落馬洲建立一個大型內地人跨境商場，等遊客買餐飽，買完即走唔使出市區干擾到讀者Ｋ及其他人正常生活！乜都話限制、禁制嘅話，香港容乜易在梁振英手中變成一個管制經濟，最後連自由都被侵蝕，溫水煮蛙！ 