管理層失職 人在中環
http://manincentral.blogspot.hk/2013/04/blog-post_21.html響酒樓食晚飯既時候，酒樓部電視，正在播放著和黃大班有關碼頭工潮既訪問。訪問去到中段，飯桌既四周傳來越來越多「媽媽聲」。
到底一場工潮，反影咗啲乜野問題出嚟？大老闆既作風刻薄無良兼賺得太盡？工運領袖別有用心搞煽動？還是一班工人要求過份？這些「結論」，唔同（政治）立場既人，自然會有差天共地既解讀，我也無謂在此亂噏廿四了。但一場工潮可以發酵到如此地步，我敢肯定地去下一個結論，就是事件當中，必定涉及有「管理層失職」。
*****
任何商業機構，即使係個「良心僱主」再加一班「任勞任怨既夥計」既夢幻組合，勞資雙方都總係必然會有一定程度上既對立存在。然而控制呢個「對立」既程度，則係企業管理層不能推卸既責任。
工潮爆發，代表控制呢個「對立程度」既工作徹底失敗。一場工潮既起點，99%以上都起源於員工對公司待遇既不滿。工潮由孕育去到爆發，亦斷唔會係一時三刻既事。冰封三尺，當然非一日之寒，然而管理層最容易犯既錯誤係，當正在慢慢「結冰」既過程當中，仍然察覺唔到，亦唔知道「有需要」處理，任由冰層厚度越結越深，到事情忽然爆發出嚟，先忽然發覺「呢舖大鑊嘞…」，這是長期坐在冷氣房內，管理人員對公司內部氣氛欠缺敏感度的最佳寫照。
面對忽然而來嘅工潮，管理人員既思維，自不然就會諗：「公司一直好地地，點解忽然會爆到咁大？」呢個問題既結論，通常都會係：「呢班參與工潮既夥計當中，裡面必然係有人響度搞煽動，搞抹黑。」引申落去既思維係：「要了結呢件事，就必須搞掂帶頭搞事既呢條彈散！」呢個諗法，某程度上都唔能夠話係錯既。但問題係，任何一場勞資糾紛，勞方都必定會有「至少一個」領袖人物出現。然而呢個領袖人物可能真係有私心都唔定，但係當管理人員一廂情願地將問題聚焦響個領袖人物身上面既時候，往往卻會忘記，事情之所以會發生既根源，係來自員工積存已久既不滿。領袖人物即使口才再好、感染力過人、甚至加上心計了得，如果缺少咗大部份員工心裡面果份不滿，工潮其實還是冇辦法能成事的。
一場工潮爆發，管理層錯在敏感度不足。然而讓工潮在不受控既情況下繼續發酵，則發映出管理人員危機處理既能力不濟。我唔敢隨便下結論，這是否代表管理層錯估形勢，但好多勞資糾紛之所以會越爆越大，甚至搞到收唔到科，處於局內既管理人員往往會歸咎「勞方」大貪大咬，企得太硬冇計傾所致。但佢地卻總係唔會記得，佢地自己響糾紛初期，一度以為自己強勢同籌碼充足時，所表現出嚟既強硬同不可一世既態度。那種「份工你唔做大把人做」既取態，響問題尚未發酵到不可收拾地步既時候，就變成左激發員工更有決心抗爭既催化劑。佢地響糾紛發生初期既說話，其實愚蠢地為問題火上加油。如果佢地認為，係有人別有用心地搞煽動的話，佢地則必須為自己既愚蠢負上責任，因為佢地親手為呢班人，提供咗煽動人心既最佳材料。
*****
坐響大班房內時間長既管理人員，面對「好日都唔會見面」既基層員工，處理上好容易會有好多盲點。任何一間機構，爆發出一場勞資糾紛，大家都可能不自覺會諗，到底邊個係「壞旦」，邊個又係「正義既朋友」。這個諗法，有時連局內既管理人都會不自覺地代入其中。然而這些糾紛之所以會「爆發」出嚟，即使過程裡面或許有無限個壞旦嘗試推波助瀾都好，管理層都不可能推卸自己有失職這個責任。
當有些管理人員，連秘書、下屬打錯一隻半隻字都會鬧到你狗血淋頭既時候，他們倘若犯上上面既錯誤果陣，也不知「該當何罪」了。
又，如果你係個年薪千萬、甚至過億既超級打工皇帝，同一個標準去量度的話，可能真係死十次都唔夠。