聖經話… 人在中環
http://manincentral.blogspot.hk/2013/04/blog-post_19.html我響基督教學校長大，聖經，細細個就要讀了。同一本書讀咗咁多年，佢俾我既感覺，咁多年都係一樣：呢本可能係其中一本世界上最難理解既書藉。裡面每一隻字你都可能懂得去讀，但串埋一齊既時候，真正既意義係乜，我有時好懷疑，以我等凡夫俗子既智慧，是否真係有能力可以解得通。
*****
認識一個朋友，佢生於一個富豪既家族。家族裡面人數唔少，利字當頭，即使係親戚，彼此之間亦唔係太過友善。家族裡面既靈魂人物，係年紀最大既阿爺。阿爺亦係第一代白手興家既創富者，家族裡面各人能夠有富足既生活，好大程度上係因為阿爺當年打落既根基所至。中國人既家庭，總係長幼有序，加上阿爺作為第一代「創富者」既地位，家族裡面上下，無不對阿爺尊敬有家。親戚之間盡管敵對味道甚濃，但礙於俾面阿爺，「鬥爭」亦總會點到即止。當遇到有爭持不下，拗唔掂數既時候，大家都會等阿爺「裁決」。阿爺講既話，冇人會夠膽反駁，因為阿爺係權威，而且有恩於家族裡面所有既人。
但係人總會老，年老既阿爺有天中風入院，入咗醫院之後，就冇辦法行番出黎。響醫院裡面療養既阿爺，喪失咗說話既能力，行動亦極為不便，終日只能待在病床上，每日都活在半夢半醒的狀態當中。
家族裡面，成員之間既不和，當然唔會因為阿爺病重而稍有歇息。反而因為阿爺無法好似以前一樣，為糾紛作出「裁決」，而變得更加氣氛緊張。呢班仆街家族成員，好快就領會到，假如沒有阿爺「授權」同「應許」，絕大部份既事情都唔能夠順利得到其家家族成員既認同。其中有部份蠱惑既成員諗咗條屎坑橋出黎，就係帶埋攝錄機去醫院，將佢地既糾紛向訓響病床上，冇能力說話既阿爺發問，並示意，如果阿爺認同既話請眨一眨眼吧。然後，這位蠱惑既成員，就向其實家族內既成員展示響醫院拍既呢條片，並表示自己既要求係得到阿爺應許。
響呢個大家族裡面，阿爺既地位好比神一樣，一直以來，阿爺既說話，對家族成員黎講，一定係對，而且唔係普通的「對」，而係absolutely right。蠱惑仔用呢條眨眼橋，明眼人一睇就知道響度「老屈」阿爺。實際上，以阿爺當日既狀態，大概係冇能力理解到，蠱惑仔響床邊同佢講啲乜嘢，更遑論能有本事作出裁決。大家都知道這件事係「老屈」，但係家族裡面既成員，卻冇一個夠膽出黎質疑，阿爺既「眨眼」係虛構同埋偷換概念。
結果故事點樣發展落去？家族裡面冇人夠膽質疑果一下貶眼之後，家族裡面既成員，紛紛唔執輸，用同一個方法，去自圓其說阿爺對佢地既要求表示「應許」。今日大哥話阿爺向佢貶左眼表示答應，明天二哥又話阿爺用「彈手指」既方式表明佢默許自己要求。後日又到三家姐話阿爺用皺眉頭表示啲乜乜物物…風光一生既阿爺，大概世估唔到，自己臨尾果幾年訓響病床動彈不得，居然都可以「忙」成咁樣。
*****
上面個故事，很荒謬吧？現實總係無奇不有。
這個故事，發生響好幾年前了。最近響新聞上面讀到，有些宗教界既人仕，響聖經引經據典，去「力證」自己既政治立場係同上帝既意願吻合芸芸。唔知點解，睇到呢啲新聞既時候，很不自覺地就讓我諗起上面呢個故事。
還是記得多年前有位神職人員跟我這樣講過：「你要接受宗教係必然會有缺點的。因為宗教於人世間，是由人去執行的。」
祝大家有個愉快既週末。