| ||||||
蕭若元創辦嘅「香港人網」上星期六做埋最後一晚節目之後結束，導火線係人民力量嘅教主黃毓民聲言「搞禍佔領中環」、「必要時使用暴力」，同老蕭撐佔中嘅立場相左。老蕭決定釜底抽薪，借結束人網呢個人力主要動員平台，完全剷走毓民嘅影響力。 老蕭同教主割席，亦代表人民力量正式分裂，「慢必」陳志全同人力主席劉嘉鴻上星期都有出席人網告別派對，明顯企喺老蕭嗰邊；「大舊」陳偉業上星期外遊前喺Facebook留言，決定退出毓民搞嘅普羅政治學苑，又話「堅持理想，遠離朋黨」，暗示要離開人力，如果此事屬實，人力將剩低黃毓民一個立法會議員。蕭若元已經講明六月一日成立新網台，每日有十到十五個鐘節目，佢自己都會參與部分節目。雖然新平台都會有論政節目，但係佢希望劉嘉鴻同陳志全唔好主持呢類節目，費事有太強政黨聯繫。 黃容根主場何俊賢坐埋一邊 新界漁民聯誼會上星期搞就職晚宴，食衞局局長高永文同唔少建制派議員都俾面出席。記者撞到盛傳被勸退嘅前立法會漁農界議員黃容根，以前不時被人話立會同區議會出席率欠佳嘅佢，原來做番新界漁民聯誼會嘅理事長，仲話依家仲忙過以前做議員，皆因上任後先發現個會財政困難，仲有成七年無做過財政報告俾稅務局，結果要交超過十萬蚊罰款，依家仲籌措緊啲資金咁話喎。現任漁農界議員民建聯何俊賢都有出席，但典禮期間就無份坐中間，中間位留俾邊個？梗係根叔、高永文、行政會議成員張學明、林健鋒，仲有深圳市人大常委會副主任周光明、劉恩等人啦。 林健鋒硬食喬老爺死貓 上星期，多個京官南下嚟見香港班建制派議員，原本旨意佢哋幫手放風，點知鬧出傳錯話事件。話說當日林健鋒（Jeffrey）搶先向在場記者引述全國人大法律委員會主任委員喬曉陽嘅講話，無幾耐喬老爺睇完即時新聞，急急出嚟澄清，話自己無講過「不能選對國家不利，對香港不利的人」做特首，又強調只係話「不能接受與中央對抗的人當這個行政長官」。唔少傳媒事後話Jeffrey傳錯話、引述錯誤，甚至話佢假傳聖旨。本刊聽番當日錄音，Jeffrey嘅原話係「佢（喬老爺）認為特首係應該愛國愛港，如果一個對中央政府對抗嘅人呢，係對香港不利，亦都不能接受嘅。」但有傳媒就報導喬老爺所講嘅特首條件之一係「不能對香港不利」。今鋪喬老爺罕有大動作澄清，間接質咗隻死貓俾Jeffrey食。記者問番Jeffrey，佢只係話「呢啲嘢，笑吓咪算囉。」 誰是真正環境局長？ 政府上個星期公布《香港清新空氣藍圖》，聲稱將改善空氣質素的任務提升至跨部門層次，多個政策局都有人喺度撐場，但傳媒焦點仍然喺環境局身上。記者會開場白由環境局局長黃錦星負責，到咗答問環節，副局長陸恭蕙即刻變成主角，除咗用中、英文雙語答問題，政策目標、污染數據瑯瑯上口，反觀黃錦星經常坐咗喺度，發言時間少陸恭蕙一半。有鳳凰衞視記者用國語發問，黃錦星竟然直接以廣東話答問題，讀番書嘅陸恭蕙反而用國語回應。唔知黃錦星係咪唔想電視台播佢條soundbite？唔少人覺得做副局長真係屈就咗陸恭蕙，以佢quali做得局長有餘，黃錦星做副局長就差唔多。政圈曾經盛傳前特首曾蔭權推薦過陸恭蕙做環境局局長，但被中央否決。由於副局長唔使中央任命，梁振英識得將陸恭蕙「回收再用」，但係工作崗位錯配，一定搞到黃錦星好頭痕。 | ||||||