關於請人，我想說的其實是… 人在中環
http://manincentral.blogspot.hk/2013/03/blog-post_85.html討厭的航班又delay了。一個人待在候機室裡，沒有甚麼活動比寫字更好用來打發時間了。
我腦袋裡面，仍然諗住尋日討論既果位「
誠實女孩子」。過去既日子裡面，有好多專欄既寫手（包括我），都寫過好多關於請人既時候，僱主要求些甚麼；又或者寫一啲有關時下年輕人，欠缺了些甚麼之類既題材。除咗果啲同讀書學歷有關既hard skill之外，我們所提到既，通常就只剩下「工作態度」。年輕人聽著我們這些老鬼，響度高談闊論有關「甚麼才是正確工作態度」之類的東西時，心裡大概響度諗：「挑！你地講果啲乜鬼虛心肯學/唔好怕蝕底/做人要主動/唔好怕辛苦…」諸如此類既嘢，我全部都做齊，你哋班仆街咪一Q樣，踩到我地一文不值？
是的，這個我承認。所以我響度諗，我哋呢班仆街既僱主，真正想要既，可能係另一啲嘢…一啲我哋連自己都無法具體地形容既「東西」。
我嘗試去理順一下我響呢方面既思維，發覺過去七年，我響專欄裡面寫既東西，可能全部都係廢既。
*****
響我Facebook上面留言既朋友提醒我，我可能錯誤地將果位「女孩子」既問題，引導到「誠實」既層面上面。而實際上，佢真正既問題係「唔夠醒目」，又或者係「唔夠世故」。
「醒目」再加埋「世故」，這些範疇都好抽象，冇所謂固定既標準。這些相對抽象既概念加埋一齊，會得出一個更抽象既結果，響社會上做得耐既人，會將呢個結果稱為「識撈」。我相信是這個了：我們這些仆街僱主，在請人既時候，都期望會請到一個「識撈」既人。或者至低限度，能夠請到一個唔好離「識撈」水平太遠既人。
問題係，乜嘢先叫做識撈？「識撈」係一個大雜會，包括咗你做人處世既「靈巧」；亦包括咗你對現實社會既認知程度；也包括你適應環境既能力；包括你日常生活中如何「知所進退」…總之簡單講，係一大堆唔知從那裡講起既「軟技巧」。
有些人對「識撈」會顯得好抗拒，因為響佢地既認知當中，「識撈」代表住假面具、訶諛奉承、虛偽、走精面、不誠實等等既負面行為，於是乎，「識撈」既行為變成衝擊住這些人既價值觀。
然而我得承認，我心目中一個「識撈」既人，或多或少係有一點蠱惑的。蠱惑係一個負面既形容詞，阿媽教仔既時候，會教「好孩子」唔應該咁蠱惑，但係出來社會做事既人，都會明白「行走江湖」，「些少蠱惑」也許係生存既必要條件之一。如何響「有點蠱惑」既生存技倆當中，依然保持住自己「純潔既內心」，當中既平衡點樣拿捏，大概就係一個人「有幾識撈」既指標。
比較偏激既人，總會以為僱主必定係喜歡果啲蠱惑到極點既擦鞋仔。老實地講，絕大部份既僱主並唔係傻既。我地的確期望下屬醒醒目目，懂得人情世故，甚至「適量地」蠱惑，但同時我地亦期望佢地有誠信，個底「係個好人」。蠱惑到極點既人，在僱主眼中其實並唔「識撈」，「識撈」應該係一種相對「平衡」既人性狀態，讓人感覺到你有一定程度上既「靈巧」。
「唔識撈」既人，好多都係「好人」。像之前那位「誠實女孩子」，儘管我對佢獨立能力存疑，但我傾向相信佢其實係個純品既好人。然而社會上，僱主想要既，唔單止係一個好人咁簡單。大家都係生存響商業社會裡面，僱主請人既時候，必然會諗既，係眼前呢個candidate，到底有冇足夠技巧去handle呢個複雜既商業環境？
響「招聘」既範疇裡面，比較難聽既係，好人未必會有好報的。在大家既學歷、能力等hard skill都冇乜大差別既情況之下，「識撈」既人，通常才會得到機會。
然而所謂「識撈」，縱然definition異常抽象，但可以肯定地講，一個真正「識撈」既人，必定唔會係一個大壞蛋。
夠鐘上機了。多謝收睇。