新年期間多睇雜誌與書，少睇報紙，幾乎漏了眼，唔知委內瑞拉貨幣貶值，好彩在丘亦生專欄見到，先知道委內瑞拉在上月八日宣佈貶值，在二月十三日生效，委國貨幣（boli'var fuerte，簡稱VEF）貶值32%。目前委內瑞拉嘅通脹率係28.5%，財赤佔GDP11%，屬南美國家常態。丘亦生話中國國家開發銀行自2009年起，向委國借出465億美元，認真係「駟馬高車出遠途」，如今委國貶值32%，中國在委內瑞拉有大量投資，若收取VEF嘅話，怎能不是「他朝赤腳返回廬」？中國人又做了支援第三世界的冤大頭。
委內瑞拉總統查韋斯係某些本地具備「國際視野」記者嘅推崇對象，因為佢肯反對「美帝國主義」、「國際資本家」及推行「委內瑞拉式民主社會主義」，即刻一人獨攬大權，修改憲法，撤消總統兩任制（此乃美帝規矩）可以連選連任做終身總統，同時大搞社會福利，明益窮人，將石油企業收歸國有後，凡有左派思想傾向之文化人，對查韋斯無不大讚特讚，至於佢如何鎮壓反對派言論自由，左派文人就視而不見。
另一位受本港左派讚賞嘅人就係模仿查韋斯嘅厄瓜多爾總統Rafael Correa（戈利亞），呢位小國總統在二月十七日競選連任成功，全憑大派社會福利，明益農民、窮人，過往四年任內，增加公僕支出四分之一，內閣部長增至四十個，將全國貧窮人口由2000年嘅64%減到現在嘅27%，梁振英想扶貧，不如到厄瓜多爾取經。
戈利亞係神仙？唔係，全靠上帝賜予厄瓜多爾石油資源啫，石油價上升，益咗厄瓜多爾做暴發戶，過往厄政府規定要將部份「油價上升帶來之暴利」撥作儲備，戈利亞就視暴利為經常性收入，兼且賴債違約，不償還外債32億美元，用晒啲錢嚟派福利，國際左派有一樣不提不講嘅，就係呢位總統，強制全國電子傳媒播放佢嘅宣傳，國有化兩間電視台，不斷向批評者發出「誹謗控告」（梁生駛唔駛學？），明白指出言論自由係國家功能之一（即係話言論自由由國家規定）。凡具備社會主義傾向之能吏，必定以自己為中心，自己最叻，批評者一定係別有用心，帝國主義走狗。可憐者就係啲文化人只係鍾意大政府派福利，連自己嘅靈魂（言論自由）都可以放棄！ 