ZKIZ Archives


旺角舊憶 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130215/18165224

呢排有人講起甚麼MK,左丁山唔知係乜,以此問肥仔K及佢表弟肥仔漢。兩人大笑。「MK即係Mongkok旺角呀!」唔,真係有代溝咯,旺角原來流行簡稱MK。其實有一次肥仔K問過左丁山:「旺角英文名點解唔係Wong Kok,而係Mongkok?」呢個問題早在左丁山讀中一時候,已問過老父,先父話旺角古稱芒角,因該區地形狹窄如角,芒草叢生,故稱芒角,英文名就叫Mongkok。據資料講,1930年代芒角改稱旺角,但英文名稱就冇改到。
肥仔漢周時與男女同學在旺角出入唱K購物,取笑左丁山不知旺角近事,瓊華已經好out嘞!近事就真係唔多識,遠事就好清楚,左丁山從鄉下一腳牛屎走出來,細路哥至大學碩士讀完,都住在洗衣街(四十年前嘅爛鬼樓至今仍然未拆),由界限街至登打士街,新填地街至太平道呢個地區範圍,留下幾十擔腳毛,有大把懷舊回憶。想當年,夏天睡在冷巷碌架床上格,無窗無風扇,熱到滿身大汗,每每走落樓下,洗衣街夠寬闊,麥花臣球場近在咫尺,清風徐來,擔櫈仔坐街邊,直到有啲涼意,先至返上樓瞓,第二朝就晨早起身去麥花臣球場公廁,雖然好臭,仍然好過在樓上與二十幾人(同屋住)排隊入旱廁。到咗年初一,就在洗衣街燒炮仗,與鄰居齊放「火箭炮」,由香海餐室射過對面美而廉,佢地就從「好好飯店」射過嚟豬欄,街上好少汽車,洗衣街係「靜中帶旺」,叫做好住,行出去就係亞皆老街,距彌敦道不遠,十分方便;放學後走上中國學生周報社(現彌敦道恒生銀行九龍總行對面)上學習班,跟梁雅玲小姐學國語,幾先進呀,但自己資質有限,學極都講唔掂,後來為咗應付會考,卒之放棄。
今之瓊華,昔年係四層高大酒樓,一樓係經紀生意人活動場所,二樓係普通平民、白領茶客,三樓係高級人士飯堂,四樓係貴賓廳,特別貴,先父偶爾帶左丁山去瓊華二樓飲茶,同鄉有一位大富翁,久唔久就叫先父到四樓食飯,間中叫埋左丁山上去享受一番。點解唔去對面嘅龍鳳茶樓呢,先父話龍鳳啲侍應有白鴿眼,只招呼常客喎,我地冇資格去。到咗中秋節,龍鳳茶樓嘅燈飾牌樓靚盡九龍,我地每年在彌敦道駐足欣賞,當係娛樂節目。

PermaLink: https://articles.zkiz.com/?id=44099

Next Page

ZKIZ Archives @ 2019