鐵路發展2020改變什麼? Home Blogger
http://www.homebloggerhk.com/?p=5925昨日在臉書上貼上了2020年港鐵發展的構想圖，雖然未經港鐵核實，但與政府現五建議或建造中之路線相符，在此撰文一提讓大家對未來的投資概念先睹為快。
先講有咩新站，可能開始站太多致大家未必為意。但走訪過歐洲日本既朋友都知，其實香港鐵路同地鐵既始祖地市巴黎倫敦相比，已經係「小巫見大巫」了。
中環南: 選址未確定，最新意向係現動植物公園，作為第時南北線的終站
黃埔站: 選址已定，大概在黃埔花園一期的馬會附近，2014-2015年竣工。作為觀塘線的起始站
堅尼地城: 選址已定，在現嘉輝花園旁邊，作為港島線的始站
古洞站: 是新建北環線其中一站，政府建路往落馬洲站時已順手起左部份古洞站台。
何文田至啟德: 為沙中線其中四站，其中以土瓜灣站選址最具爭議。現時決定方案較近土瓜灣中心，原本定係翔龍灣附近。
其實除左留意新站外，路線之改動亦需留意，因為會大大減低某地往市中心之路程，直接推升樓價。就以元朗為例，距離雖遠但有西鐵線後由元朗去尖東都係25分鐘，令元朗樓價先起跑，以前大家覺得「冇咁入」既屯門反而遲左幾年先有反應。
未來將會以東西線同南北線做概念。東西大致可理解為將西鐵同沙中線合併，更有可能會加上馬鞍山線。第時由馬頭圍或土瓜灣經紅磡過海將唔再驚塞車，近海一帶有望成為另一奧運站，即最近商業中心既高階住宅區。至於原馬頭圍、土瓜灣舊市中心，將好似元朗咁係五到十年內被取替。東西線會將現時集中於西面經深圳灣口岸黎香港既自由行帶到九龍灣區域。係郵輪碼頭攪得好睇下，九龍灣觀塘有望成為旅遊商業區。
南北線可以由羅湖直通中環，以後去海洋公園十分方便。最受惠應為沙田，何文田，由沙田去中環的時間大為縮短，唔會比奧運站去中環耐好多。黃竹坑發展比想像中慢，酒店就起左幾幢但整區未夠資源投入。港島區還看堅尼地城及香港大學站對西區帶來之發展，西區因舊樓太多，收唔夠地去起一個地標式商場，而堅尼地城站上蓋講明做公園，所以想用商場去拉動該地工作機會及人口質素，似乎唔係十年內可發生之事。加上九龍灣一帶規劃較易，嘉里為區內其一大業主，大家會集中資源做好啟德PROJECT而避免取難道發展舊廈區。
一個不可不提係北環線，係政府咨詢中佢成事係最高既，亦配合新界東北之發展。到時元朗可會是東北之主要城市，更有不少工作機會提供。就好似現時沙田咁，為馬鞍山火炭什至大埔居民帶來工作機會，減少誇區工作。諗樣早前建議發展屯門工業區與深圳前海融合亦是同一道理，希望元朗加上屯門，令政府發展古洞，錦上路新市鎮工作更易成事。
另外有讀者問荃灣屯門鐵路會否成事，諗樣認為不會。要等屯門往西走之人流就到飽和點先有可能成事。現時西鐵雖十分擠擁，但港鐵未用盡可改之車卡長，你可見月台已預留三卡車既位作未來延伸之用。而荃灣至屯門中間的深井、屯門東亦不見人口快速增長，連搵地方去起站都難，填海不乎效益，所以不覺得此線會實行。
最尾一個有點浮跨，政府建議由西環起橋搭至昂船洲再去青衣入東涌。昂船洲大橋已為此項目提供其一路面，但完成此工程所費人力物力，及建造難度均較高，除非特首真係整個人工島出黎，否則興建西環至東涌一線未具成本效益!