除左解答初心者難題外，諗樣希望再講解冇錢係咪一定要博?
相信八成以上既讀者初出社會都係由零開始，至多好似本文初心者咁好彩父母有樓留比佢。如有名校畢業文憑，事業確實在起步期快人一步，但唔代表可以由頭帶到尾。講返初心者，總括咁講都同其他人一樣都屬冇錢，而大專畢業有幾十萬係袋兼冇卡數係呢個世代值得稱讚。佢睇諗樣講「冇錢者絕對要博」，反而有錢有樓係手應該穩打穩紮行落去。咁講佢應否趁後生利用槓桿係物業市場獲利呢?
其實都係諗樣既錯，講D唔講D。人老確實需要用手上資產錢搵錢，而後生仔必須著重人搵錢，此乃諗樣想講既道理。希望初心者唔好誤會諗樣叫大家趁冇錢時放手係物業市場一博，而放棄進攻自己實務本業。後生仔初出社會一定冇錢，照咁講全部大專大學畢業生都要去「博」? 讀得咁多書父母當然唔想你只靠博去搵錢，所以之前先有庸才之文，叫大家先努力工作了解自己係專才庸才天才後才決定「點入軌」。
另外，千祈唔好建議父母按層私樓比你去作投資(當然如你有必須既自住需要而冇其他方法下按出黎就可以)。就當你靠呢舊錢發左達，我諗你就算唔後悔都難免一生心中有憾。諗樣唔係只講初心者，係要趁呢次發文重申你去打理財富既重點同原由。
講返初心者，未做野先儲到幾十萬非常好。政府現時正設法幫緊佢地上樓，宜在此時靜待政策出籠，做一個冇樓係手既業主。另外就當佢係拚博非常，佢係而家博左買樓反而第時少左個機會。就好似有張大牌係手咁，而家出定留番第時出呢? 建議等待時機，等待都係一種藝術。
所以如果你只有一注錢投資物業市場而沒有居住需要既，都係隔岸觀火為佳。至於之前有建議其他讀者買樓換樓，係因為根據佢地提供既收入計算，及已預留借貸力係淡市入貨之用。如果我係初心者，會將已有約四十萬作低風險投資，努力係呢幾年用人搵錢賺多四十萬。到時父母有間樓比佢，自己又再將儲到近一百萬，及後一拆二於不同時段買兩間樓。淨係三十歲前做到擁有三(兩間買一間)間樓係手已經羨剎旁人。當然「好仔不望爺田地」，集中精力發展事業，靠自己成就事業，呢個過程絕對係無價! 亦都冇人可以比到你既美好記憶。