📖 ZKIZ Archives

最高工時 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130109/18127255
《蘋果日報》一月四日報導，商界激烈反對「標準工時」立法（按：獅子山學會稱之為最高工時，下同），香港總商會之立法會代表，行政會議成員，經民聯（在立法會有七票）召集人林健鋒講到話點都要死砌，不排除有商界人士上街抗議㖭。商界人士邊度敢上街呀，難以想像啲老闆會拋頭露面，在政府總部外高叫口號，向梁振英遞抗議信，反之，工聯會話如果唔立法，佢地會反枱（同CY反枱？有冇問過中聯辦先？）工聯會加埋泛民，通稱泛工黨，人多勢眾，勢力龐大，陳婉嫻與李卓人聯合組織示威嘅話，場面會幾好睇。
呢日飲茶，喼噸對左丁山講：「有咗最低工資之後，請人已經好難，如果再有最高工時，我都唔知點編備人手，舊年有婚宴嘅話，搵散工企堂，要六十蚊一個鐘，仍然難以搵到好手呀，食材來價又不停增加，好彩我係打工啫，調轉頭我係老闆嘅話，都幾惡頂！」呢位打工仔居然站在老闆角度睇最高工時，唔知算唔算好似周恩來咁，背叛自己出身階級呢？
華人辦餐館，素以勤力、長時間工作取勝，一月四日IHT有篇報導講西班牙經濟大衰退，年青人失業率高達五成，但西班牙境內嘅唐人超市，唐人餐館嘅生意好旺盛，以廉價取勝，令到收入日減嘅西班牙人難以抗拒，紛紛幫襯。一位華人話：「我地在中國大陸捱過不少鹹苦，來到西班牙，每日開工十六小時算得係乜！」新華人移民抱此態度工作，幾容易爭贏平時食午飯要三小時嘅西班牙人。篇報導舉一個例子，一位王小姐約二十年前跟隨父母移民西班牙，全家唔識講西班牙話，父母在唐人餐館工作，一家每天吃雞蛋渡日，爸媽夜晚在廁所打地鋪，等仔女在睡房讀書，五年後，王氏父母向親戚借錢開舖，子女負責洗碗；眨嚇眼，今年王小姐有24歲，在哈佛讀過一年經濟學，做四份兼職，父母已退休回大陸，佢每個月匯一千歐元回國養家。有陣時，外國人憎厭中國移民，就因為中國人沒有甚麼最高工時概念，總之死做死慳死抵，捱到子女有出頭天。現時西班牙有大量房屋銀主盤出售，七至十萬歐元一間，不少買家係華人移民，八成用現金付款。香港果真需要最高工時？CY最好想清楚！
PermaLink: https://articles.zkiz.com/?id=42668
Next Page
ZKIZ Archives @ 2019