📖 ZKIZ Archives

中電加價不會停 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130111/18129664

聖誕假期前，特區政府宣佈批准咗中華電力與中國石油嘅天然氣長期供應協議（即所謂西氣東輸，合約期長達二十年）。中石油係巨型中國國企，勢力龐大過中電好多，而且用天然氣發電，減少排放、逐漸取代焦煤發電，到咗2015年，天然氣佔發電燃料遞增至四成，係特區政府嘅既定環保政策，中電無可抗拒；天然氣本來可以向世界各地採購嘅，但中國投資咗數以百億美元計嘅西氣東輸項目，要搵買家嘅噃，中電呢隻肥雞，點可以飛甩雞毛呀？中電以前申請興建液化天然氣儲藏基地，預備向外國蒐購油氣（不止天然氣，可包括目前在美加流行嘅頁岩氣wet shale gas），但在2008年就俾政府拒絕咗，表面理由係中電投資落大型LNG基建，即增加固定資產，可根據保障利潤協議，向用戶收回，構成加價壓力。
特區政府咁好心？為防中電加價，否決中電興建LNG Terminal，又係「只看結果，不問動機」，結果就係四年後，中國石油鎖定咗一個無議價能力，永不會違約嘅中華電力做二十年天然氣買家，對中國好有益有建設性。呢啲天然氣來自中亞細亞，經天然氣輸送管運到新疆再經中國西北省份送到香港新界，都費事講有幾多里路長咯，大家可以想像得到。中石油嘅天然氣供應價格講明按照油價及運輸成本調整，油價高企，呢條（萬里油管）維修、營運成本高嘅話，新界九龍電力用戶唔該俾錢！
造物弄人，如果中電有一個LNG及儲蓄庫，買入、儲藏美國／加拿大頁岩氣嘅話，燃料價格加上運費仍然會便宜好多，2001年時油價與頁岩氣價差不多，後來美加發展出新技術，頁岩氣大量增產，今天油價指數比頁岩氣價格指數高出近三倍！中石油好彩有中電做長期客戶啫，否則唔知去邊度搵客！上星期《經濟學人》報導，歐盟各國、特別係德國，因為歐洲電廠缺乏儲藏LNG設備，現在又不敢用核電，發電廠因經濟理由，改用焦煤發電，美國電廠就因為頁岩氣便宜紛紛採用，於是美國煤礦以低價向歐洲推銷，歐洲電廠用俄羅斯天然氣嘅話（東氣西輸），成本太貴，於是用煤發電，大行其道，令到EU嘅甚麼環保排放標準亂曬籠（因煤發電之碳排放比頁岩氣高一倍）！香港情況特別，強要中電用貴價天然氣發電，又想中電唔加電費？難啲啩！
PermaLink: https://articles.zkiz.com/?id=42666
Next Page
ZKIZ Archives @ 2019