ZKIZ Archives


萬南 二五中環 買一手股票 可炒上五成?

1 : GS(14)@2015-08-16 13:51:45

http://www.metrohk.com.hk/index.php?cmd=detail&id=287570&search=1


萬南習慣睇實十大升跌榜,睇吓有乜異動股票喺金魚缸興波作浪,上星期五升幅榜排名冧把溫嘅大唐投資(1160)單日升54%,再望吓嗰日成交金額,原來只得14萬元。大唐一手係十萬股,亦即係全日就得呢單成交。至於今個星期,就連續兩日都零成交。
如果讀者細心留意,大唐市值僅兩億,連殼價一半都未夠,而且唔見佢伸手集資,喪失股票上市嘅功能。但睇見大股東密密增持,再加上喺市場買雞碎咁多都觸發裂口上升,可見大唐已經乾到極度龜裂,但與此同時,亦有一班市場中人暗地掃咗唔少,正喺度同大股東較量。所以有乜風吹草動,大唐股價都會非常之Chok。

大唐投資僅得8名員工
如果係蠱惑莊家,睇見有人同自己過唔去,普遍會向下炒,迫令敵人無啖好食自動退場。不過大唐老闆喺香港有頭有面,創辦人李和聲(圖)係富豪御用經紀,曾喺1998年亞洲金融風暴代表港府決戰大鱷;至於李和聲兒子李德麟,就係前金銀業貿易場理事長。雖然兩位李生已經喺公司退落嚟,交由第三代接棒,但在情在理,老李、中李都會睇實小李,唔會畀佢哋亂嚟,搞壞金漆招牌。
再睇番大唐最新年報,舊年連埋3位執行董事、3名獨立非執董及1名公司秘書,全公司竟然只得8名員工,人力資源非常緊張,可以話係極級慳家。萬南好有興趣知道最後嗰位唔係高層嘅員工係咪三頭共六臂,做齊秘書、司機、茶水等工作。
PermaLink: https://articles.zkiz.com/?id=292014

萬南 二五中環 港交所網站 亂改搵錢嘥

1 : GS(14)@2015-08-16 13:52:12

http://www.metrohk.com.hk/index.php?cmd=detail&id=287570&search=1

如果要搵一個財經人必睇嘅網站,萬南相信港交所(388)旗下嘅披露易一定有份,事關所有上市公司對外公布嘅通告,都統一由呢個網站發放,難怪舊年有超過4.52億次瀏覽量。知情人士話,今年4月開始「港股大時代」,多咗好多財技公布,唔少行內人不停按F5更新披露易,希望快人一步了解單刁內情,相信今年有望打破舊年紀錄喎。
不過,披露易旗下用嚟睇上市公司股權分布嘅「披露權益」功能(圖),卻一直被行內取笑,其複雜程度亦令唔少資深財經人投降,就好似舊年新地(016)郭氏兄弟公布股權更新,市場上竟然有唔同解讀,令人非常苦惱。
一直以來,市場都有聲音希望港交所改善「披露權益」,增加透明度。而最近港交所行政總裁李小加要求搵外判專家更新網站,呢個項目更要搞足兩年,大家都以為港交所從善如流,一併改革披露易啦,點知今次只執其他冇乜人睇嘅部分,披露易不在計劃之中,難怪畀人話應做唔做,搵錢嚟嘥。
PermaLink: https://articles.zkiz.com/?id=292015

萬南 二五中環 China Club跌落Chinese Club?

1 : GS(14)@2015-08-23 01:01:57

http://www.metrohk.com.hk/index.php?cmd=detail&id=288269&search=1


近排股市完全無魚,好多靠金魚缸搵食嘅老友大呻世界難撈,手多多掃貨博執十格八格嘅,最終損手爛腳居多,情況相當不妙。就喺呢個時候,細價股資深炒家K哥突然打電話嚟約萬南去中環食晚飯,喺咁嘅慘淡時勢,有人請食飯當然二話不說應承啦。
到咗食飯嗰晚,萬南準時到達舊中銀總行頂樓嘅中國會,K哥未到便先坐低,望望四周圍依然鬼多過人,難怪好多湊老外生意嘅都肯畀幾十萬入會呢度。冇幾耐K哥打嚟質問萬南點解仲未到,先知原來擺咗大烏龍,佢話去Chinese Club(圖)食飯,我就誤以為係China Club。

萬南幾乎忘記咗Chinese Club(華商會)嘅存在,佢哋會址喺環球大廈隔籬,屬於比較平民化嘅會所,裝修嘢食都普普通通,入會幾皮嘢已可。萬南趕到過去見K哥,都忍唔住話估佢唔到,竟然有華商會會籍,佢就笑笑口話China Club又貴又唔好食,邊及Chinese Club性價比高,呢個時勢自己友食飯,梗係慳得就慳。
PermaLink: https://articles.zkiz.com/?id=292057

萬南 二五中環 官永義 變身散戶?

1 : GS(14)@2015-08-23 01:08:06

http://www.metrohk.com.hk/index.php?cmd=detail&id=288269&search=1

上星期,「抽水大王」官永義(圖)旗下嘅永義國際(1218)公布沽出手頭一批港交所(388),平均價大約$217,幫公司賺咗兩千零萬。但咪以為官生炒港交所好準喎,事關佢旗下另一上市公司永義實業(616)喺上個月用咗4千零萬掃港交所,平均作價要$242,唔夠一個月已經每股帳面蝕$40,足足輸緊7球幾。
好多人都唔明官生點解咁分裂,兩間旗下公司可以對港交所完全唔同View,其實你哋對官生認識太淺,佢只係擁有一般炒鬼嘅特質。就好似永義實業早前用咗7球掃入南方A50(2822),通告講明買入原因,乃貪佢係具吸引力嘅投資,點知4個交易日之後就盡沽,唔計使費賺咗7萬大元,手法十足企喺銀行門口嘅師奶散戶。
PermaLink: https://articles.zkiz.com/?id=292058

萬南 二五中環 賭廳莫財賣名車

1 : GS(14)@2015-08-23 01:09:01

http://www.metrohk.com.hk/index.php?cmd=detail&id=288269&search=1

股市乃香港最大賭場,要講都係呢兩個月先開始唔掂啫,隔籬埠馬交情況仲慘,雖然遊客人數冇乜減少,不過旺丁唔旺財,強國豪客轉晒去新加坡喪賭,搞到馬交賭場(圖)連續十幾個月生意愈縮愈細,起緊新賭場嘅濠賭股亦放軟手腳,情願將工程進度慢慢做,希望減省開支對抗嚴冬。
博企底子厚都要縮皮,專做豪客嘅賭廳直頭仆直,有啲索性執笠,唔執嘅吊緊鹽水亦要賣家當,萬南聽到某賭廳今個星期將3部接載豪客嘅平治S350變賣,呢幾部車落地超過7年,就算賣得出都唔慌靚價,但知情人士講明要錢唔要貨,更唔排除有其他賭廳效法,所以想執平車大把機會。


萬南
筆者為資深中環
金融界人士
[email protected]
PermaLink: https://articles.zkiz.com/?id=292059

萬南 二五中環 馮裕鈞遇電郵騙案

1 : GS(14)@2015-09-19 21:17:31

http://www.metrohk.com.hk/index.php?cmd=detail&id=290908&search=1
  

萬南每日收到過百封電郵,有時真係花多眼亂,再加上近排多咗電郵騙案出現,的確唔敢立亂打開一啲有可疑嘅附件。繼葉劉淑儀早前收到假冒港鐵主席錢果豐電郵,搞到電郵戶口被駭客入侵,仲冒認佢將50萬轉走後,萬南收到好堅嘅江湖傳聞,指利豐(494)第4代掌門人,亦即現任行政總裁Spencer馮裕鈞(圖)亦遇到類似情況。
外面傳嘅版本係咁嘅,原來Spencer唔知由幾時開始,被駭客入侵咗佢嘅公司電郵戶口,駭客入得去,當然係想食大茶飯,摸清楚利豐嘅架構後,就冒認Spencer發咗封電郵畀利豐財務總監Ed Lam,叫佢過一筆銀碼相信唔細嘅數落某個戶口,阿Ed收到後覺得唔多對勁,於是好多事打電話畀老闆Spencer求證,識破係騙案,未至有金錢損失。

而喺呢個時候,Spencer先知自己電郵被駭客入侵,快快手叫IT除病毒,但唔知之前有乜機密文件被駭客睇咗呢又?而發生呢單嘢之後,據聞Ed亦同樓下啲手足講,叫佢哋做足防範措施,以防再有類似情況出現。
PermaLink: https://articles.zkiz.com/?id=292285

萬南 二五中環 復星有橋 循環再用

1 : GS(14)@2015-09-19 21:18:01

http://www.metrohk.com.hk/index.php?cmd=detail&id=290908&search=1

舊年4月,萬南寫過有「上海和黃」之稱嘅復星國際(656)竟然冇折讓又「了能」供股,目的就係唔想散戶跟供,結果真係認購額不足,令到身兼包銷商嘅大股東趁機增持。
當時萬南已講咗,用逆向思維諗就一定要買,供股完咗復星股價就一路向上,足足升咗一倍有突,萬南雖然冇咁叻喺高位沽清,但總算有顯著回報。
復星頻頻去歐洲血併收購,伸手要錢好正常,但要留意佢集資嘅辦法,晌幾個月前嘅大時代,復星選擇高位批股畀馬雲(圖)同馬化騰,到依家股價回落不少,佢又再施展舊年冇折讓又「了能」供股法,大股東真金白銀供股之餘,仲希望趁低吸納,所以喺依啲位應該建底,何況依家買平雙馬多多聲,感覺零舍良好。
PermaLink: https://articles.zkiz.com/?id=292286

萬南 二五中環 麗新態度超正面

1 : GS(14)@2015-09-19 21:18:46

http://www.metrohk.com.hk/index.php?cmd=detail&id=290908&search=1

上星期萬南話岳少(林建岳)(圖)旗下公司嘅租約英文麻麻,文章出街之後,立即收到麗新高層嘅電話,希望了解清楚事件,實行有則改之,無則加勉咁話,態度認真一流。萬南聽到咁樣,亦都認真睇清楚發生乜事,原來嗰份係Letter of Offer,嚴格嚟講並唔算租約。
麗新高層仲話集團所有嘅租約,全部交由香港知名律師行負責,所以英文絕對冇問題。咁又係,律師睇過,照計有冇甩漏都一早隔走啦。
PermaLink: https://articles.zkiz.com/?id=292287

萬南 二五中環 17入股「17」 直播彤叔近況鄭家純晒胸

1 : GS(14)@2015-10-04 03:23:45

http://www.metrohk.com.hk/index.php?cmd=detail&id=292049&search=1
近排最矚目話題,唔係炒新iPhone,而係失驚無神彈出一個直播社交App名叫17,瘋魔萬千後生仔,萬南認識唔少金融圈好友更玩到通宵唔瞓。究竟有乜好玩呢?但因為有啲人越軌直播一啲踩界嘢,被App Store拉下架暫時冇得玩咯。
提起17,更多中環人諗起呢個係新世界嘅上市編號,有口痕友就話如果17入股17,純官鄭家純做17App嘅名譽主席,除咗夠噱頭,仲大大提升重新上架嘅機會。班友甚至愈吹就愈認真,想叫一啲做開直投嘅老友做串連,乘機賺隻佣咁話。

雖然十劃都未有半撇,但班友已經諗咗好多極具話題嘅直播頻道,例如直播久未露面嘅彤叔近況,等大家睇吓佢老人家健康良好;亦可在全線周大福直播賣金情況,萬一有賊人進來,除咗可當閉路電視,就算出咗舖頭條街四圍都有人有手機,用17直播賊人逃跑路線都相當過癮;最後一條剎食頻道,就係搵鄭家純做深宵直播,不過唔係大老闆純官,係同名同姓嘅性感女星雞扒妹(圖),有佢坐鎮,肯定吸引唔少男粉絲。
PermaLink: https://articles.zkiz.com/?id=292705

萬南 二五中環 Cosplay公司都上市

1 : GS(14)@2015-10-04 03:24:10

http://www.metrohk.com.hk/index.php?cmd=detail&id=292049&search=1

近排創版全配售愈玩愈離譜,立基工程(8369)上市幾日示範瘋狂過山車,只可以講不適宜老散操作,要買便預咗有輸晒嘅心理準備。其實近日申請上市嘅公司,唔少都概念獨特,就好似中國派對文化(1532),單睇個名仲以為係搞派對生意,但原來佢係全中國最大Cosplay假髮製造商、Cosplay服飾就排第3,仲係國內性感內衣第2大生產商。
中國派對文化似乎專做女性生意為主,但原來兩名老闆係雄糾糾男子漢,本身對Cosplay興趣唔大,只係做假髮起家,見Cosplay近年大熱才踩隻腳入去,至於點解搞埋性感內衣就無從稽考。其招股書將「性感內衣」列為專業詞彙,以下是形容「以性感和神秘為特色的一類內衣,能營造強烈的視覺吸引力,最終形成視覺刺激,刺激人類五官並喚起人類的性慾。」寫嗰位律師文字功力幾有意境喎。
PermaLink: https://articles.zkiz.com/?id=292706

Next Page

ZKIZ Archives @ 2019