📖 ZKIZ Archives

無奈的香港人 Home Blogger

Hi Hi Lumyeung Bro您好! 

我剛於今年年頭結婚, 我33歲, 我先生35歲, 我和我先生合共月薪為hk$40000一個月(當中hk$1850為MPF), 我們現在於屋企人提供的單位居住(只有我兩, 沒有其他人同住), 象徵式收我們hk$2000租(我們是萬分好彩), 我同我先生每月儲蓄hk$7000 (當中hk$3000係月供基金), 我們每月都支付hk$7000作為我們兩位母親的家用, 加上我們兩人月供保費為hk$5000, 我們一般家庭開資為hk$4000, 我會自己儲起hk$5000作私己! 我先生好慳, 自己返工, 搭車連洗費hk$3000, 其餘的就係我自己洗, 好似仲有5仟, 但我成日都好似唔知洗左去邊! 我地都有諗過生bb, 但計條數好似無錢養(因為我地無屋企人可以幫手湊, 如有左的話, 就要請工人), 好無奈! 

我地無任何結欠, 壞帳, 咭數, 只有月供一張按摩椅, 每月HK$750, 直至2013年12月! 

我地而家有流動現金hk$300,000!現在眼見樓價有升無跌, 好驚再唔買呢世都上唔到車, 又驚泡沫就爆, 而家買的話, 就變負資產! 我好想買間用黎租出去(但9成按好似唔可以明盤租出去, 只可暗盤),變相租客幫我地供數, 將來老左都有個地方, 但係我又唔知可以買d咩樓先至穩陣同保值, 而我先生就話點解唔等d樓價跌先再諗買樓, 又話而家又唔係無地方住, 係有! 但唔係自己, 人地要我地幾時搬走我地都無得say no (但呢個機會係微, 但唔代表無), 我成日諗點都係自己有間樓穩陣, 但我每次叫我先生去睇樓, 佢都十萬個唔想, 佢覺得而家根本就唔係買的時候! 到底我的想法有無錯?我點先可以同我先生的想法一致? 請您給我一些意見, 感激萬分, 謝謝! 

諗樣相信你地係勸奮慳儉之人，努力工作，努力儲保險，努力MPF，努力養老豆老母，但係自己就連生仔都冇時間。不論你想生定唔想生，現時香港已畸形到市民想生仔都「唔得」! 當然你有能力生，但係外在環境如錢銀、地方、工作穩定性都令人冇意欲成就此「人生大事」。將來可見政府又要搞d老人亙助會去解決「老野冇人理」既問題，成班老人家就係處婉惜當年因財政問題而不作生育此決定。呢個係香港既發展方向嗎?

而係香港連些少既物質需求都未可享受到。比筆者都會幾沮喪，但諗樣同你地一樣，係人生中踼過逆境波，會搵出路行出去。 對於買樓一事，如你地現時財政未見十分寬鬆，正所謂:「能力若不及，只有等時勢，急不得」。同埋如果樓價再升，你既問題再成為更多人既問題，到時政府會更快幫你。所以唔駛急，你唔會呢世都上唔到車。

另一點係就算佢地買左樓，佢只不過係將「努力工作，努力儲保險，努力MPF」之後加多一項，「努力供樓」而矣。你每日朝九晚六既工作，生命中三份之一既時間正經營著一堆臨老都唔想回億起既經歷。希望你現時找到既人生目標，而唔係漫無目的咁跑。

當然諗樣唔係貶抑無奈人，而係想將佢既無奈，話比有緣睇到呢篇文章既朋友聽，包括特首梁振英。我知佢已經做緊野去分隔資助房屋市場及炒賣市場，但若然市民想係呢排置業，已和薪金脫節既樓價已令市民變成無奈、十分沮喪、而仲有些微能力既市民都不顧風險置業，包括本篇既無奈人都有此想法，你話仲可唔可以咁樣落去?

政府亦都大事張揚2015年樓市援兵會至，大量房屋建成機會高。但僧多粥少，始終唔會起夠哂公屋比「人客」。可以做既，包括將資源重新分配比真正有需要既人，勸走公屋富戶。更可大膽考慮「殖民」蛇口，解決冇地用，收地難之困境。

請返無奈人，既然開源唔係一時三刻做到既事，請諗節流。首先你每月供五千蚊既保險係咩保險呢?? 你講每月儲七千，其中三千係月供基金，聽落呢三千條數又唔係入落個五千蚊保險費度。如每月人壽加醫療保險供成五千，以你地三十幾歲又似乎太多。可以既請將所持保險整理回覆研究一下。

當然保障冇人嫌少，但先要滿足自己基本要求再諗加大保障為正路。生小朋友、置業應放係醫療及人壽保障之前。試問家庭支柱離世，你見咁唔好彩接受訪問既，通常都話好彩佢老公淨低層樓比佢，有幾可話係淨低醫療保險。當然你可以買幾百萬或千萬既保額去等同間樓，但分別係，樓可以或住或收租的。亦都係香港人退休保障既重要一環。

唔好因金錢問題而唔生小朋友，養大人仔確實係豐儉由人，亦唔會因你冇錢培養佢而令佢成世唔開心，頂多佢唔可以任職大機構去涉足黑幕而矣。而無奈人確實幸運，有屋企人支持居所。請努力儲錢，幾年後如樓價回落可加按屋企人比你住間樓，用作首期置業，到時就唔駁寄人籬下。若然親人離世而將現住所送贈，你更會是先苦後甜，總之別灰心。現時不適合你們去做大動作，樓價跌半成已輸了你幾年儲既錢，實在唔好夾硬黎，加緊留意政府幫夾心階層之措施。