ZKIZ Archives


中區寫字樓當炒 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20121208/18093743

行政會議久久不能決定發出免費電視牌照,皆因有巨大勢力嘅無形之手,阻頭阻勢。另外兩項擺在雪櫃好耐嘅案件,因政治性不算嚴重,但繼續拖落去嘅話,一定會耗損梁特首嘅政治資本,於是在十二月四日行政會議拍板嘞:(一)中區政府合署西翼交俾律政司署及非政府組織運用,不拆卸重建為商業大廈,算係向反對派保育團體讓步,費事刺激該派人士上街或申請司法覆核,繼續纏擾政府;(二)何東花園本是私人物業,政府如要宣佈為古蹟,強搶民產保育,業主之限制發展權利,實屬不妥,業主早已聲言若政府如此,必會告上法庭要求賠償,最初講嘅數目已係七十億元,後來樓價狂升,現在應該不止此數,試問政府有何上佳理由動用納稅人嘅七十億去賠俾何東爵士孫女?重建瑪麗醫院都只係七十零億元之嘛,點解唔用錢去起更多醫院同公屋,而要為一時之快,送巨資俾世家後人?故此呢次政府決定得啱呀,無謂到處引起火頭啦。
左丁山素來反對保留西翼,反對保育何東花園,前者因中區嚴重缺乏甲級商廈地皮,導至租金不斷上升,不利營商環境,後者因為何東花園係私人業權物業,99%香港人未見過,唔知在那裏,動用公帑去保育之,簡直係開玩笑。兩個反對嘅立場,並不矛盾,左丁山素來信奉市場及私有產權,行政會議今次決定,一對(何東花園)一錯(西翼),應該係包含了政治計算,梁振英希望耳根清淨而已。
何東花園重建為十座豪宅獨立屋,因其山頂地段獨一無二,背山面海,遠眺近觀,無不優美,將來賣幾多錢一間,難以想像,非左丁山發夢所能擁有,無謂多講。但中區寫字樓奇缺,政府合署西翼重建,雖只能提供三十餘萬平方呎,對大市影響,唔算太大,但心理上就令投資者及炒家覺得,中環再無新地皮可供興建甲級寫字樓之用,以後中區寫字樓可以繼續炒供求失衡,業主可以安心加租。咁就影響好多寄居中環乙丙級商廈嘅中小企啦(包括左丁山在內),橫街橫巷嘅餐廳食肆隨時被貴租逼遷,中區特色漸失矣,最後可以怪誰?當然係發展局長期規劃之失啦!
PermaLink: https://articles.zkiz.com/?id=40760

Next Page

ZKIZ Archives @ 2019