|
||||||
香港素有「東方之珠」的美譽，卻 很少人知道香港是全球最大的珍珠交易中心，名副其實的「珍珠港」，每年交易額超過五億元。背後的推動者，是珍珠界無人不識的老行尊——梁適華，人稱「適 哥」。八十二歲的梁適華，出生於珠寶世家，七十年代於南洋開設珍珠場，養殖號稱珍珠界「巨無霸」南洋珍珠，旗下公司康 源，現於澳洲、菲律賓、印尼坐擁三大養珠場，最「耍家」是出產罕見的南洋金珠，年產十萬粒，每粒批發價可達二十萬元。這位南洋珠大王，更將日本及澳洲的南 洋珠拍賣會「移師」來港，將香港變成「珍珠港」。上月底，拍賣會在會展舉行，梁適華獨家邀請本刊入內拍攝，娓娓道出「珠光寶氣」背後的故事。 第四十九屆Paspaley南洋珍珠拍賣會於灣仔會展舉行，歷時三天，名為拍賣，實為暗標。早上八點，一盤盤白色﹑金色的珍珠，放置在長枱上，每盤都標上 珍珠數目及重量，以日本重量單位「錢」計算，並以日圓計價。「日本以前執養珠業嘅牛耳，所以好多嘢都沿用佢嗰套。」一早到場「督師」的梁適華解釋。買家看 中「心水」後，可登記取珍珠，回座位慢慢研究。梁適華邊忙着和熟客打招呼，邊笑道﹕「今日（第二天）最熱鬧﹗第一日好多買家只係睇吓揀吓，試吓價，第二日 就出力投標，最後一日叫『吹風爐』，前兩日投唔到貨嘅買家，就要加大力度！唔到價，我唔賣o架！」 拍賣會首次曝光 拍賣會一年四次，三月、六月同九月在香港，十一月在日本。買家來自世界各地，亦有本地珠寶商，如周大福等。「拍賣會邀請咗一百名頂級嘅行家參加，我哋包埋 酒店及機票，全球超過五成嘅南洋珠都喺呢度交易！」梁適華揚眉道，轉頭見到一名日本人經過，即用日文寒暄一番，再對記者說﹕「對面拎緊嘢飲那位日本人，佢 阿爺同老豆你哋都識，係名廠相機賓得（Pentax）嘅老闆，不過已經賣咗盤俾一間專門生產內窺鏡嘅公司。」 下午四點截標，五點「放榜」，只公布每盤中標珍珠的價錢，中標者保密，結果會直接傳真到投標者的酒店，如此「秘密」，梁適華解釋︰「用咗幾多錢，買咗邊批 貨，甚至喺邊度買，都係行內嘅禁忌。會場一向閒人免進，今次係第一次公開俾傳媒拍攝﹗」是次拍賣，有七十一名買家成功競投，「最多係香港、日本同埋印 度。」他指，約有五成珍珠成功售出，成交額六億零四百萬日圓（約六千萬港元）。寧願「賣剩蔗」，亦不會低價求售，以防「做爛市」，「近年多咗人搞珠場，出 產多咗，南洋珠唔起價，加上全世界經濟唔好，唔算好年，賣唔晒就留番下次拍賣會。」梁適華說。 「海中黃金」最吃香 今年市道平平，但梁適華仍然「飲得杯落」，事關公司最 「耍家」的南洋金珠，在今次拍賣會大豐收，第一天已經「清倉」。「白蚌較常見，所以南洋珠以銀白色為主，金嘅蚌就好少，所以金黃色嘅珠十分罕有！白蚌同金 蚌嘅比例大約一比一百。」康源於菲律賓的珠場，清一色養殖南洋金珠，「我哋喺嗰度有四個珠場，一年出產五十貫（一貫等於一百兩），約十萬粒。可以講，我哋 嘅金珠算係首屈一指！」梁適華一臉驕傲道。南洋金珠的批發價較白珠「高一個開」，一粒直徑十八毫米的頂級金珠約值二十萬元。梁適華的公司名叫康源，七十年代起在南洋發展南洋珠養殖場，現於澳洲、菲律賓及印尼設有養珠場，是拍賣會的珍珠供應商之一，佔大會成交額約三成。家族做開鑽石及珠寶批發生意，梁適華卻轉投較冷門的珍珠，主要為「話事權」，「鑽石出產俾De Beers等國際公司操 控住，珍珠就唔同，我可以自己養，控制得到！」他二十九歲已隻身往當時的珍珠王國日本，做珍珠貿易，並跟日本人合作養殖珍珠，「坐螺旋槳飛機去，最頻密 時，一星期去兩次。父親初時驚危險，唔俾去。」梁適華笑說。當年人工養殖的珍珠多經台灣人轉售來港，梁適華想不如自己進口，但父親梁釗林思想傳統，認為天 然珠才高貴。最後梁適華去日本做了市場調查，才說服父親。 港取代日做「珍珠港」 人工養殖珍珠的技術原由「珍珠之父」、日本人御木本幸吉（Kokichi Mikimoto）於一八九三年發明。自此，日本珍珠業發展蓬勃，一躍成為國際知名的「珍珠港」。後來，經過多年養殖，珍珠場老化，加上海水受工業污染， 影響產量，日本優勢漸失。現時，Mikimoto仍為日本著名的珍珠首飾品牌，在港亦有六間分店。五十年代，澳洲人Nicholas Paspaley 將日本養珠的技術引進澳洲，成功以世界上最大的蚌貝「白蝶貝」培養出珍珠，南洋珍珠正式誕生。Nicholas創立的Paspaley是全球最大的南洋珍 珠供應商兼珍珠珠寶品牌，在澳洲擁有超過二十個養殖場，珍珠產量一度佔世界南洋珠供應量近七成。Paspaley五十年代已在日本舉行南洋珠拍賣會，八十 年代尾將拍賣會移師香港，由梁適華旗下公司接手籌辦。 前海軍陸戰隊睇場 「依家澳洲嗰個最大，喺達爾文附近，全部都要由當地人攞牌。」梁適華說，南洋珍珠普遍來自世上最大的珍珠蚌白蝶貝，只有澳洲和印尼之間沿海水域才可培育 「白蝶貝」，屬於大顆類珍珠，皆因大部分體積直徑約十毫米，甚至達至十八毫米，堪稱珍珠界的「巨無霸」。澳洲的養殖場一般養四到六萬隻蚌，最多可達十萬 隻。「唔係話有錢就可以養多啲，要睇水流、水深、養分、天氣等，仲要間中拎佢哋出嚟擦吓背。」五八年已跟梁適華打天下的舊伙記潘先生說。白蝶貝只能在溫暖 和不受污染的水域中生長，水流不能太急或太緩。梁適華兒子﹑南洋珠協會董事梁家治（Lawrence）指︰「養殖場最高級技術人員都喺東京大學讀過海洋生 物學，統統係博士。通常係合約制，三個月至一年都有，底薪要一百萬港幣，再根據年產量計花紅。」Lawrence指公司會 在同一個地區開數個珠場，「萬一出問題，好似海水污染，都唔使total loss！」不過，搞珠場最怕是偷珠。梁適華憶述，早年在馬來西亞搞的養珠場曾遭匪徒洗劫，日本籍經理更被打死，「澳洲嗰邊水域，康樂設施還康樂設施，養 殖還養殖，分得好開。菲律賓就無分，所以最驚俾人偷珠。我哋專登請咗退役嘅海軍陸戰隊睇場，佢哋喺當地守咗幾十年，熟晒環境。」Lawrence指，現時 菲律賓珠場有二百五十名全職員工，當中有一百五十人是負責保安的。投資一隻蚌，回本期起碼五年。白蝶貝被視為國寶，不許出口，只能原地採購，原地繁殖。一 隻白蝶貝約十一至十五美元，「啲蚌要先養兩、三年，再將珠核植入白蝶貝裡面，養多兩年先可以收成。粒珠大唔大﹑靚唔靚仔好視乎隻蚌，如果唔靚仔，生一胎就 算數啦！最多三胎，已是老蚌生珠，質素較差。」梁適華鬼馬道。 珠寶界「公職王」 坐擁珍珠王國，西裝骨骨的梁適華身上卻不見絲毫珠光寶氣。他笑說賣了數十年珍珠，自己甚少珍藏，只因「唔好同客爭，唔好俾佢哋覺得你好嘢就留俾自己。」梁 適華可說是富三代，祖籍順德，自小不愁衣食，「我阿爺嗰代喺廣州開當鋪，爸爸都喺當鋪打過工，後來轉做經營珠寶玉石。」梁適華父親梁釗林曾在皇后大道中開 設寶光珠石公司，初時做零售，後以批發為主。「講真呀，我鍾意做批發多過零售，因為人人 都識貨，都係行家。」梁適華接手後，先後創立嘉年鑽石及康源貿易。早前曾提議在香港設立鑽石交易所，因得不到政府支持而作罷。梁適華是珠寶界的「公職 王」，七十年代起已擔任香港珠石玉器金銀首飾業商會理事長至今；八五年，創立香港鑽石會，且出任貿發局珠寶業諮詢委員會主席，一做十五年，打破政府規定最 多六年的規定。早年，不少人都投訴金飾成色不足，「舊時無定成色，亂七八糟，九四、九五咩都有，總之呃得就呃。我代表業界向政府要求立例規管足金成色標 準，八四年頒布法令話要三條九，依家全港都用四條九，仲高過法例嘅標準！」梁適華自豪道。 大馬主曾任輔警 外向﹑好動的梁適華年輕時興趣「多籮籮」，尤愛騎單車和打乒乓球，現在仍是香港單車聯會主席及乒乓球總會副會長，「依家年紀大無玩啦。今個月五號，單車聯會搞活動，慶祝李慧詩喺奧運攞獎，我順道宣布唔做主席，俾啲後生嘅玩！」現時，公司已交由兒子及姪兒接手，家住大坑渣甸山的梁適華，早上會去維園散步一小時，做完「晨操」，歎完早茶，再返公司「過 日辰」，中午愛往陸羽吃飯，生活規律。「早兩個月仲有打網球，不過，醫生話老人家最怕跌親，唔准我玩，改為跑步囉。」梁適華笑說。出身富貴，但五八至六八 年，「少爺仔」突然跑去做輔警，「十年都係散仔，多數處理家庭糾紛和交通事故。」他笑道。七八年已加入馬會做馬主，養過八匹馬，包括「小成功」﹑「大成 功」﹑「再成功」﹑「更成功」等，他稱為「成功系列」。「舊時有隻日本馬王叫『High Success』，我咪借用嚟改名，我做人同生意嘅信念都係要敬業樂業，有信心及毅力，就必定成功﹗」 一顆珍珠的誕生 南洋珠屬海水珠，由世界最大珍珠貝——白蝶貝或金蝶貝養殖出來，體積為珍珠之冠，直徑可達十至十八毫米。人工養殖珍珠，關鍵是把珠核植入珍珠蚌內，珠核通 常是由淡水蚌貝加工製成的小圓珠。珍珠蚌受到刺激，會分泌出珍珠質包裹珠核，久而久之逐層累積後形成一顆珍珠，整個過程約兩年。在養殖過程中，要定期幫珍 珠蚌「擦背」，清除殼上的寄生蟲及有害物質。 |
||||||