|
||||||
|
到港大校長府吃 午飯，聽港大校長徐立之及高層講解如何慶祝一百年校慶及三改四以後嘅課程，真係茲事體大，一枝禿筆寫唔完。港大一百年校慶活動，於一月九日正式開始，是日 在薄扶林沙灣徑香港大學何鴻燊體育中心舉行啟動禮，上午十一點開放戶外野餐區，下午二時開始巡遊及典禮，預料有四千名港大校友同學同寅參加，場面會幾盛 大，不過港大校友多數有車，最好將架車泊在校本部停車場，坐穿梭巴士到現場好嘞。 吃完校長府之A餐，當然冇八十九元一公斤嘅日本米，徐校長 好慳嘅，見到老總C有公司車來接，急忙搭順風車，呢度係幾難搵到的士返中環嘅。司機好醒目，避晒塞車黑點，直撲IFC機鐵站，左丁山落車行返大道中，啱 晒，我地啲中環老餅認為置地廣場左右係中環核心，但一位八十後才俊話畀左丁山聽：「我地與好多近十年來港工作嘅洋人都認為IFC就係中環，香港會、立法會 係中環邊緣。」哦，原來大家對中環嘅認知，已有好大分別，置地廣場已算Out Out地咯喎。 行到遮打大廈，樓下嘅哀嚎呼喊喪禮鑼鼓聲響到 震天，日日如是，二時後一定聽到，嗌到拆天都係想證監會處理雷曼事件啫，搞足兩年，仲係不知如何收科，上星期日城市論壇講「井水不犯河水」，電視畫面所 見，有現場觀眾舉起一塊牌，上有即將離任嘅韋奕禮相片，不知係當示威相還是車頭相呢？ 韋奕禮不被留任，立即引起不少人追捧前港交所行政總裁 周文耀為繼任人。講資歷，周文耀梗係夠照啦，做過新鴻基證券、新鴻基財務、港交所、滙豐基金經理，再返港交所，由股票經紀以至基金管理人嘅角色，知道一清 二楚，管理港交所又有聲有色，做證監會行政總裁，一行入去就掂。只可惜，我地無謂做抬轎人嘞，在上月嘅恒隆數學獎頒獎禮中，左丁山捉住周文耀講： 「Paul，SFC等梗你係嗎？」阿Paul即刻耍手擰頭，斬釘截鐵咁話：「你開玩笑，咪攪我，我退休咯！」退休後仍有公職噃，就係數碼港管理局主席呢啲 「無糧職位」，純為社會服務而已。大家唔好難為周文耀嘞，人哋打工近四十年，輪都輪到享受人生啦，做乜又要食證監會碗熱飯？ |
||||||