📖 ZKIZ Archives

名人仙遊 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120923/18022594
牛津出版社高層，版權專家，教科書出版老行尊李慶生先生逝世，只有57歲，可惜也。李先生之喪禮在九月十九日舉行，出版界人士往致哀者甚眾。左丁山在行街 散步時遇到一位大學出版社社長，佢對李先生之版權知識，甚為佩服，指後生一輩在這方面有排學都未跟得上佢。大家傾起此點，不期然有啲荒謬感覺，昔日教育局 副局長陳維安與教科書出版商講課本分拆，教材獨立出版時，書商指出版權問題有排搞，陳副局長硬是話冇咁嚴重，唔信版權有咁複雜，真係一個標準外行人。而今 真正版權內行人仙遊，希望教育局搵人真正研究嚇教科書之版權，勿知法犯法，任由學校老師自編教材時，自行copy教科書及外國材料。
呢位大學出版 社社長又話孫局長臨走時推出電子教科書，可能成為吳局長一個新難題，慎防爛尾。電子教科書不是PDF咁簡單，製作成本好高，成書後，售價一定比印刷教科書 昂貴，到時消委會唔識嘢，又會呱呱嘈。社長話：「電子教科書要有互動，要有動畫加插，如果問National Geographics、BBC攞一小段video加插在電子教科書內，你就知道有幾煩！」左丁山唔知冇緊要，可惜教育局在舊任領導之下，詐作唔知。
李 慶生先生設靈之夜，有人到場致祭，偶然發現七十年代權傾一時嘅簡悅強爵士遺體亦在香港殯儀館內。簡爵士享年九十九歲，一九七九年時係行政局首席華人代表， 港督麥理浩上京見鄧小平，親自得悉中國一定會在1997收回香港，此消息當時是國家機密，不能外洩，香港人當然不知。但後來見到簡爵士退休，保持極度低 調，簡家自簡悅慶、簡悅隆做完東亞銀行主席之後，再無簡氏後人在東亞，全面由李家掌權，心水清人士就諗到簡家知道一些別人不知道之內情。現在這一切都係歷 史咯，事後孔明，以錢財計，因知道香港回歸中國而淡出香港者，賺少好多好多好多，最佳例子就係怡和集團。簡爵士曾是香港極有影響力人物，為人溫文有禮，做 事不徐不疾，似足標準英式紳士，如此人物難以求諸今日矣。
PermaLink: https://articles.zkiz.com/?id=37755
Next Page
ZKIZ Archives @ 2019