|
||||||
位於銅鑼灣波斯富街的老牌涼果店「上海么鳳」，以二百元一兩的「話梅王」聞名，近年突然密密開鋪，五年間開了十七間分店，堪稱香港「涼果大王」。年僅二十八歲的第三代接班人司徒永信（Ivan）最近更「踩過界」，開雲吞麵店。 當人人以為「上海么鳳」努力抹走「老餅」形象時，其實公司只成立了十一年，而真正擁有五十多年歷史的老字號，是位於富明街的「么鳳」，話事人是司徒永信的 姑姐司徒潔貞。兩店相隔只有數步之遙，前者風光高調，後者暗淡沉默。雖是同根生，同姓司徒，但分家的恩怨，加上同行如敵國的隔閡，如今兩家人雖是親戚卻無 情。這場延續了十多年的話梅風波，就如涼果店一樣，百味紛陳。本刊找來新舊兩派話事人，解開當中不為人知的酸甜苦辣。 上海么鳳最新的分店位於銅鑼灣謝斐道，新店設計以紅黑色為主題，隔壁的麵店「一碗」仍在裝修，身穿T恤、短褲﹑戴着cap帽的Ivan，幾乎每日都來監 場。「波斯富街依家月租十萬元，兩年後續約，我擔心租金再升，支持唔到，所以用三十幾萬租咗呢個二千四百呎嘅鋪位，三分之一做上海么鳳，其餘就用來搞麵 店。」麵店其中一個老闆是前森記雲吞麵的股東，森記在波斯富街開業二十年，年初因加租至四十多萬而結業，Ivan認為雲吞麵「有得做」，遂牽頭開鋪。 一鋪兩店，原定於八月中齊齊開張，最後只有上海么鳳如期開張。Ivan脫下帽子，邊撥涼，邊嘆口氣道﹕「唉，好煩呀，我誤信親戚介紹嘅裝修公司，俾咗七、 八成費用，但判頭走數，工程又未合規格，要搵另一個師傅做過。當係買一個教訓啦，依家我自己跟番，啲爐具喺邊度買，要幾多錢，我都識！」二十二歲就沾手生 意，Ivan一口氣開了十七間鋪，「因為上海么鳳做得太順喇，所以我今次掉以輕心咗！」 新舊么鳳不相往來 訪問期間，Ivan母親朱崧妹經常來監場，不時將兒子拉到一旁訓示兼教路。年輕的Ivan，喜怒哀樂全擺在臉上。記者提議到上海么鳳舊鋪拍照，他多番提醒 ﹕「不要搞錯富明街嗰間喎，我哋係波斯富街嗰間。」翻查資料，原來么鳳早已分家。母親朱崧妹○一年另起爐灶，創辦上海么鳳，而爺爺留下來的么鳳士多，現有 三間分店，由姑姐﹑大伯及姑媽三家人持有。Ivan坦言與司徒家親戚沒有聯絡，諷刺的是，由波斯富街轉一個街角就到富明街，兩家人總有遇到的機會。「有次 我離開鋪頭，聽住iPod，抬頭見到姑姐，但佢扮睇我唔到。（尷尬嗎？）我無。」Ivan輕描淡寫道。Ivan對母親必恭必敬，但提起父親司徒偉權，卻突 然「爆粗」，只說他是「揸的士嘅，一早已經同阿媽分開住」。資料顯示，司徒偉權生前和妻子共同持有小西灣富景花園的單位，他○六年去世後，名下的一半業權 留給了妹妹司徒潔貞，其餘財產全數捐予公益金。Ivan母親○八年拿出七十多萬向姑姐司徒潔貞買入原屬丈夫的一半業權。難怪兩母子對司徒偉權不存半點感 情。記者在富明街么鳳士多找到姑姐司徒潔貞，打扮樸實的她冷冷地表示對上海么鳳認識不深，更絕口不提朱崧妹及Ivan，「聽講係街坊開嘅，好似有十間分 店。仲有好多人唔識分，我哋之前已經登報話俾人聽，老字號係我哋呢間，一開業就有呢個雞仔嘜頭。」司徒潔貞強調。到記者主動提起Ivan，她才道﹕「過時 過節無一齊食飯，呢啲嘢似乎唔係我主動，如果佢邀請我食飯，我會去。（你會邀請嗎？）我唔得閒去邀請，我身體唔係幾好，要去睇醫生，比較忙。」 為錢反目一分為二 這場話梅恩怨要由創辦人司徒汝蕃說起。一九六○年，他獲士多老闆賞識打本，在銅鑼灣怡和街創辦么鳳士多。六二年已加入士多的前員工蕭振波（波叔）憶述，初 時滿街都是小型辦館，競爭激烈。么鳳遂引入大量涼果零食，雪糕汽水、香煙洋酒等。老闆娘方翠娥更會親自下廚烹調滷水鴨腎及東風螺等小食，又在早餐時間賣麵 包。士多後來搬至富明街，鄰近利舞臺，客人喜歡先買「口立濕」，再進場看大戲或電影。「嗰時一碗雲吞麵三毫子，我哋啲話梅一蚊兩，算係好貴，但好多有錢人 喺半山、跑馬地揸車過嚟，泊喺白沙道，再行過嚟買。」波叔憶述。士多年中無休，早上六、七點開鋪，晚上十二點才收工，為司徒汝蕃帶來第一桶金，並於八二 年，以一百三十五萬購入鋪位。波叔指每逢新年鋪頭便人山人海，「我哋賣嘅芋蝦片、慈姑片、角仔等香口食物唔係間間鋪頭都夠膽入貨，中秋節就代理澳門嘅顯記 月餅，好多人嚟買。」波叔咧嘴笑道。Ivan指母親未嫁入司徒家前，已在么鳳打工，嫁給父親後，便名正言順跟爺爺學做生意。九九年，司徒汝蕃離世，鋪位以 一千二百多萬放售，連同其他資產平均分配予四名子女。「我哋攞咗三百幾萬。」Ivan說，么鳳繼續租用原址營業，但紛爭不斷。「媽咪繼續喺么鳳做嘢，但每 個月得七千五蚊人工，點夠我哋生活？賺咗錢又無得分！」Ivan講起仍略帶憤怒。最後，姑媽司徒瑤拉攏朱崧妹另立門戶，由於二人資金不足，便找來老伙記波 叔及在白沙道賣絲襪的玉姐（歐玉好）夾份，開設上海么鳳。「阿爺話過姓司徒嘅就可以用么鳳呢個名，以前阿爺打工嘅士多叫做上海，為咗區別，我哋就加埋『上 海』落去。」Ivan解釋。 爭住認「正宗」 後來，上海么鳳股東相繼退出。波叔於九龍城另立門戶，○七年姑媽見店鋪加租萌退意，將股份賣予朱崧妹，翌年朱再買入玉姐股份。「我始終希望么鳳是司徒家的 生意。」Ivan說。但外人離開後，這場話梅風波，卻變成司徒家內鬥。多年來，雖然各有各做，但由店名到貨物的種類﹑擺設等仍十分相似，難免有比較，最大 爭議是貨源。Ivan指上海么鳳的入貨由母親朱崧妹控制，不少由爺爺那時沿用至今，更直指么鳳士多「賣名不賣貨」，「好像靚嘅糖蓮子供應商得一﹑兩間，佢 哋都話無供貨俾么鳳士多，咁佢哋喺邊度拿貨呀？」Ivan說。不過，姑姐司徒潔貞反駁指自己的供應商才是父親「用開嘅」，強調貨源與上海么鳳不同。「我唔 知佢哋邊度攞貨，但佢哋賣二百蚊一兩嘅話梅王就太貴啦﹗」司徒潔貞說。 競爭白熱化 么鳳士多率先於○七年在九龍城及元朗連開兩分店，但上海么鳳不久即急起直追，現有十八間店，年底會增至二十一間。Ivan解釋，○五年由澳洲回港時，發現 銅鑼灣總店營業額最大，新年高峰期「做唔切」生意，一年下來扣除交租，只得十多萬盈利。於是他重新設計公司標誌，並籌備新鋪，走新派路線。現大部分分店置 於二線商場或較偏僻的地鋪，「最貴係裝修費，至少要二十萬，人流較少，有啲鋪每個月蝕緊一千幾百，但係我唔驚，因為新年一定有得執。」Ivan直指涼果毛 利不高﹕「唉，一年四千萬營業額只賺得四百萬。」不過，自稱「搵唔多」的他生活富貴，擁有四輛車，其中一輛車價值過百萬。他與母親現住在小西灣藍灣半島， 單位○九年以六百九十萬買入。母親另持有太古城及小西灣富景花園兩個單位。Ivan更說希望在銀線灣置業。Ivan希望將上海么鳳打造成香港手信品牌，但 又嘆氣道﹕「食呢啲口立濕嘅人越嚟越少。」他計劃夥拍本地食物製造廠推出芝麻餅、鳳梨酥等新產品，並加入燕窩、茶葉及元貝等乾貨，以及將部分暢銷貨品上架 至7-11便利店。另一邊廂，司徒潔貞卻慨嘆生意難做。資料顯示，她名下有兩個利園山道寶榮大廈單位，一個在九三年買入，另一個是司徒汝蕃的遺產。「租金 貴，市道唔係太好，依家只係賺番自己份人工。附近有兩間上海么鳳，唉，生意少咗一半。」但她口中仍堅持不介意上海么鳳爭生意，並輕聲道﹕「個後生仔 （Ivan）做得好，我戥佢開心，恭喜佢，唔會望佢唔好嘅。我只係希望可以守得住么鳳，在銅鑼灣原址有成五十多年歷史，很難得。」至於Ivan是否覺得勝 過對方？他平淡地道﹕「唔係話贏唔贏，亦唔介意對方點睇，但如果阿爺仲喺度嘅話，我相信他會為我做嘅事感到高興。」 老臣子波叔自創「公鳳」 六二年加入么鳳的家臣波叔，有「金牌買手」之稱，熟悉入貨渠道，○一年曾入股成為上海么鳳股東。他家住九龍城，○四年決定與女兒蕭鳳玉和女婿胡偉新在衙前 圍道開設「龍城么鳳」。新店甫開業即惹官非，遭司徒潔貞為首的「么鳳士多」入稟控告其侵犯商標，被法庭發出禁制令。波叔惟有在么字上加一點，變為「龍城公 鳳」。但改名並沒影響生意，店內貼滿明星相片作招徠，「周潤發鍾意食南乳花生，佢老婆就食無花果。」蕭鳳玉如數家珍道。○八年公鳳曾於紅磡蕪湖街開分店， 後因加租，以及該地區的消費力不高，分店已於去年結業。 | ||||||