七級偽術：問責是公關起步點
1 :
GS(14)@2018-02-13 03:17:01肯問責，唔係大晒。大把機構，係又認錯，唔係又認錯，認完錯又再錯，這個下台，那個又下台，唔見得當中有足夠誠意。不過連基本問責都做唔到，明明已經百辭莫辯、明明已被千夫所鄙夷，依然面懵懵死撐下去，擺明諗住拖吓拖吓會被其他大新聞蓋過，做大官做到如此鬼鬼祟祟，更加不知所謂。其實就算畀你蒙混過關又如何？沒有誠信，失去尊嚴，還談甚麼貢獻社會？執筆時又聽見政府有人事變動，新聞處處長和旅遊事務專員對調，花生友普遍認為安排不尋常，似是有人不滿新聞處表現，連慣常的三年一調都不等，索性早換早着，大概以為換人就有新氣象。如果這是林鄭的主意，如果她以為自己民望每下愈況是政府公關做得唔好，我想話，sorry囉，公關從來冇本事化腐朽為新奇，product唔得、service唔掂，遇上先天不足，後天失調，公關曉飛都冇用。更加更加重要的是，公關的真心話，你到底聽唔聽得入耳先？多少次，同事或客戶以為公關會識做，不介意做做橡皮圖章，最多整定句阿媽係女人式回應就是，沒想過公關真會大膽到向上層獻計喝停計劃，而老闆居然又buy喎……是的，有些公關建議，真的未必啱聽。你問心，會不會停止與民為敵，割席撤換鄭若驊？你會不會肯承認，稱DQ周庭你沒參與，皆因你人不在港，是十級低端的回應？你會否同意人皆有錯，好打得都有犯錯時，錯咗咪誠心誠意認句錯囉……繼續剛愎自用，公關再醒都冇用。彭瑪莉
來源:
https://hk.finance.appledaily.co ... e/20180208/20298466