財路：炒二線股越秀等爆
1 :
GS(14)@2018-01-28 18:48:55越秀地產（123）喺咁多隻有阿爺背景內房當中，PB至抵搞，資金水向下流，開始炒二線嘢，越秀等爆邊。場內專業預估，越秀今、明兩年預估PB0.49倍同0.47倍，比起本身過去10年平均0.6倍已經平咗截。又越秀對上越秀集團，係廣州市國資委管理，場內同樣份屬阿爺背景嘅，華潤置地（1109），兩年專業預估PB1.3倍同1.2倍、宏洋（081）0.95倍同0.77倍、深控（604）0.68倍同0.63倍、五礦地產（230）無專業預估，家陣PB0.6倍，保利（119）0.55倍同0.53倍，越秀至抵搞！越秀家陣坐擁土儲930萬平方米，折合1億平方呎土儲，兼以13.5發展戰略，喺珠三角同長三角重點配置資源，呢批土儲，以每方呎增值100蚊咁計，已經為越秀帶嚟上百億元肥仔資產增值。越秀土儲唔削，連土儲升值，集團實際PB，係仲吸引。越秀上年累計合同銷售408.7億元人仔，增加35%，原定目標360億元人仔，超額完成，睇到係，內房銷售理想，越秀嚟緊日子，嚟自房產利潤有保證之餘，增值變得好實在。場內專業預測，越秀今、明兩年EPS0.21港元同0.25港元，兩年預測PE得7.7倍同6.4倍，越秀過去十年平均PE講緊10倍，集團兩年預測PE，又比本身平均值，平咗一截。彭博券商報告當中，廣發最牛，睇越秀目標價2.6元，以集團現價1.66元計，代表潛在升幅60%，目標價明年PB0.75倍，啱先追到上上邊內房明年平均PB水位。錢雋細價股專家本欄逢周二刊出
來源:
https://hk.finance.appledaily.co ... e/20180123/20283175