操盤手札記：由即食麵看股市
1 :
GS(14)@2018-01-22 05:57:45港股連升14日後，終於唞氣，回吐73點，收31338。喺打大佬31958歷史高位前，估計屬大漲小回，唔跌穿30200，仍可睇好。呢趟升市，淡友監生挾死。不過，淡友離場，若有較大調整，少咗佢哋嘅平倉買盤墊底，風險反增。美國10年期債息逼近2.6厘，美債「熊出沒注意」！美股三大指數就連日破頂，反映資金棄債投股。資金除咗流去美股，亦有流去其他股市。美匯指數（DXY）跌穿91關，亞洲貨幣指數（ADXY）則升穿110關，反映資金流出美國，流入新興市場。美元走弱，亦令商品價格走強。現時除咗美元、美債，似乎乜嘢資產都升！呢個現象唔多健康，一旦美元反彈，升過龍嘅資產就會跌到散。事實上，以RSI衡量，美股、港股已極超買，當然唔一定冧市，超買可以再超買。睇港股歷來超買後走勢，後市一係2008年咁Melt Up，一係1994年、1997年、2015年咁見熊！舊年藍籌中有5隻倍升股，包括騰訊（700）、平保（2318），呢兩隻我今年繼續睇好。點解？唔係睇水晶球，係睇即食麵！中國即食麵銷量2013年達到高峯，賣出462億包，但之後連續3年下滑，2016年只賣出385億包，比高峯期賣少近80億包，跌幅近17%。2017年就未有數。點解會咁？關經濟發展事！一來人民收入增加，想要食得健康；二來智能手機普及，網上訂餐盛行。2011年至2016年，中國網上訂餐嘅市場規模，由216.8億元增至1,662.4億元人民幣，增幅近8倍。難怪內地即食麵一哥康師傅（322），喺2016年9月被剔出藍籌。現時中國網民達7.3億，喺互聯網新經濟下，科網龍頭騰訊除咗本身處於高速增長期，亦可透過分拆釋放價值，據講就快分拆微醫（WeDoctor）上市。平保亦擁有11家互聯網科技公司，涵蓋醫、食、住、行、玩，分拆陸金所、平安好醫生已有聲氣。騰訊、平保大把金蛋，可逢低收集。割柑人本欄逢周二刊出
來源:
https://hk.finance.appledaily.co ... e/20180116/20276056