📖 ZKIZ Archives

iBond．雷曼 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120612/16417655

政府再度推出 iBond發售，限額一百億元，每手一萬元，有一百萬人申請，就每人配到一手，有二十五萬人申請，每人配四手，市場人士估計申請人數在二十五萬至五十萬人之間，認真墟冚。
政 府發 iBond，等於政府向中產階級派錢，政府根本唔需要呢筆錢，派息與通脹掛鈎，當係5.5%好嘞，一萬元收息五百五十，幾好吖，有閒錢擺響度，不如買 iBond問政府攞息，借孖展申請或在二手市場以溢價買入就話有風險啫，用真金白銀買入擺三年，取回本金，有乜風險呀？一啲人士竟然講到買 iBond只能贏粒糖，輸間廠，真不知有何邏輯，自己唔買，都唔好咁樣嚇人吖。

記者 G叫媽咪申請 iBond，陪埋媽咪去中銀香港一間港島分行辦手續，老人家以前未有戶口，於是銀行職員要做足「法事」，講解風險，了解客戶，最後要錄音，搞足一個鐘頭， 媽咪對記者 G講：「咁鬼麻煩，唔買咯，得一手都冇乜肉食啫！」老人家埋怨手續花時間，職員為之苦笑，因為此乃雷曼後遺症，金管局要求嘅，唔做就犯規。媽咪後面有幾位 師奶仲煩氣，因排隊睇住媽咪開戶口，怨到出晒聲：「仲要等幾耐呀，我地有投資戶口㗎。」後來等到不耐煩，走過隔籬間銀行，睇住舊客戶流失，中銀職員更加笑 唔出，開一個長者新戶口唔見咗幾個熟客噃。以前大陸有句口頭禪，矯枉必須過正，現在香港銀行處理投資產品銷售，就有呢種情況發生，因規矩是死的，金管局明 令執行，銀行不得不從；銀行另一方面又怕一啲大戶他日輸錢，翻面不認，於是照足規矩做。左丁山有一次在醫務所碰到一位退隱已久嘅名人，身家有相當，佢對左 丁山講：「我依家住在雪梨，呢次返嚟香港一行，順便到銀行買啲股票基金，銀行職員識咗我幾十年嘅啦，經理出埋嚟歡迎我，但買基金時，要我聽講解，要我錄 音，我叫佢地慳番啲手續啦，我簽個名就得，但佢地唔肯，於是佢地一路講我一路睇蘋果日報，睇咗九個字，佢地先至話 OK嘞，根本我都唔知佢講乜！」聽講銀行界人士不斷向當局反映，要求對一啲客戶可以個別處理，當局或會考慮微調「矯枉過正」喎。


PermaLink: https://articles.zkiz.com/?id=34359
Next Page
ZKIZ Archives @ 2019