中門大開：振英蛇齋餅糉路線
1 :
GS(14)@2012-08-23 13:23:35http://hk.apple.nextmedia.com/financeestate/art/20120823/16627459
梁振英可以話係真正抽水王，總之有 mileage，就必定出場曝光。大政策做唔到，有爭議就閃開，齋做民生派糖活動。最近巡視行人天橋加裝電梯，擺到明係抽水，上次就巡視老人兩蚊搭車優惠。
振英走蛇齋餅糉宣傳路線，算到好盡，一來用官媒，即使文字記者不滿，就算冷處理有關新聞也好，只要出到免費電視，就有著數。官媒發片或做集體採訪，至少減低文字記者殺傷力，因為一去到現場，記者天職就乜嘢都問，唔會跟住振英劇本去配合，好似巡視天橋 Show，記者去到必定追問「膠波夫婦」吊臂式露台劏房危害公眾安全，應否立即下台，又或者佢本人僭建幾時交代，最後公關 Show變質，正面宣傳效果消失。
蛇齋餅糉路線，一直係政黨地區工作路線，八十年代民主派以居民運動、維權方式介入社區，搞拆遷補償、重建爭取居民支持，奠下民主派地區工作模式。建制派就走社區福利模式，因為要撐政府，政策上冇可能激，所以就多做訪貧問苦、蛇齋餅糉，爭取居民支持。30年來，兩條地區政治路線已合流，民主黨也做蛇齋餅糉，民建聯也非事事保皇，一樣要在地區做維權工作。而政府在地區中的政治角色也轉變成為「球證」，地區專員以分配資源討好各方，家家有求。
截劫建制政黨「功勞」
當振英重拾蛇齋餅糉工作模式，最受影響會係建制派地區工作。起行人電梯 Show劇本應是建制派約見張炳良，大家整色整水一輪，最後張炳良宣佈接受建議，用十億改善全港天橋，再跟手同日建制派地區議員及當區立法會議員將早已印備「成功爭取全港天橋加建電梯」的 banner掛上。家由梁振英中途截劫，佢做咗成功爭取嗰個，動用政府宣傳資源自吹自擂，其他人冇位企。
走蛇齋餅糉路線，短期可以改善振英形象，用溫總式訪貧問苦包裝自己，再活用官媒控制訊息發放。但政治代價是日後與建制政黨越行越遠，利益共生關係消失。
如果政府要堅定不移用蛇齋餅糉對抗公民社會，下一步不如定期落區接 Case，做到盡，抽乾水為止。
添馬男