二五中環 萬南 東瀛遊沖繩插旗 做埋酒店營運商
1 :
GS(14)@2017-10-30 12:13:13http://www.metrodaily.hk/metro_c ... %E5%85%A9%E7%90%83/
香港人一向鍾意去日本旅行，就算之前「311大地震」後，有好多傳言話日本輻射嚴重，遊日港人依然年年創新高，舊年就高達184萬人次，比2012年嘅48.2萬人足足多咗接近三倍，當中萬南都佔咗幾次！因應商機無限，主力做日本團做到上市嘅東瀛遊(6882)，就諗到喺當地起埋酒店，實行一條龍賺錢咁話！
東瀛遊噚日中午就宣布，啱啱喺日本沖繩買咗四幅土地，佔地面積2,103平方米，作價折合大約6,800萬港元，會用嚟起酒店發展同埋營運，主要迎合公司沖繩旅行團以及自由行產品嘅住宿需求。計我話，6,800萬喺香港分分鐘連一間豪宅都買唔起啦，作為地膽嘅東瀛遊，而家可以用嚟買到四幅地皮起酒店，而幅地皮仲要喺正那霸市牧志三丁目，即係港人經常去掃貨嘅國際通同牧志市場附近，簡直係抵刁啦！