ZKIZ Archives


樂香園:投行最慘烈監管殺到

1 : GS(14)@2017-09-17 17:38:09

今年港股大升,成交改善,你以為金融圈應該歌舞昇平,開心等出花紅?可惜現實係,海迪不少朋友對這一行前景仍是憂心忡忡,甚至壓力較之前任何一年都要大。先講buy-side。今年指數單邊大升,講求多邊對沖風險的hedge fund表現注定麻麻。Long-short fund亦很慘,羸錢是無用的,你要贏到指數才能體現出你作為active芬佬的價值。海迪認識的芬佬朋友當中,大概只有四分一今年是能跑贏大市(恒指迄今累升27%,MSCI China仲升咗42%)。由於今年升勢集中在個別sector、甚至是幾隻股份身上,而基金又需要遵守單一股份不能持倉多於10%的原則,單是今年升咗一倍的「股王」騰訊(700),在MSCI China的權重已達16%了。仲要揀中多幾隻股份出來outperform股王?真係談可容易。
Sell-side更頭痛,事關金融界由明年起,將會迎來翻天覆地的轉變。歐盟自明年1月開始,將對金融機構實施名為「MiFID II」的新監管要求,簡單來說,就是全面改革投行的收費模式,要求收費透明化,由以前「一口價」賣全套服務畀機構投資者,改為逐個部門、逐項服務收錢。即你以前入餐廳擺低599蚊就可食buffet,現時就要由一杯水、一隻碟、一個待應、每件蛋糕,逐樣同你收錢。首當其衝的,自然就是股票研究及交易部門,由以前交易費中已包埋講股,到明年起,投資者就要真金白銀畀錢買research report,甚至連你和分析員傾個電話、食餐一小時的午飯,都有個價,都要畀錢。雖然措施是在歐洲實行,但對香港影響仍然重大,因為只要個客在歐洲有業務、或舊錢是來自歐洲,都要遵守呢項規定,包括做佢交易對手的香港投行部門,有行內朋友就估計,這涉及香港市場約三分一的資金。可以想像到的是,基金客戶會因為這轉變,明年起縮減brokerage list,用少幾間投行;就算仲用嘅,都會減少要嘅服務,投行明年收入肯肯定會大跌,細行更雪上加霜。至於基金,細芬就因為畀唔起錢,在大投行削資源下,唔做佢哋生意,更缺乏支援,亦會難捱。近日多間外資龍頭大行,已出了新價單,其中research由最basic幾萬蚊美金一年,到最高幾十萬都有。無人夠膽估,新例真的實施後,整個行業到底會變成點,總之大家已預咗減人工,而沒很高ranking的分析員,在歐洲已出現大舉逃亡潮。新監管及科技突破衝擊各行各業,現時就連天之驕子的投行,都可能要面對被碎片化的命運了。海迪




來源: http://hk.apple.nextmedia.com/financeestate/art/20170915/20153258
PermaLink: https://articles.zkiz.com/?id=341218

Next Page

ZKIZ Archives @ 2019