ZKIZ Archives


留下一點歷史 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120529/16376644

出版書局約吃午飯,準時去到交易廣場翠玉軒,行前已問清楚秘書係邊一位訂枱,果然,知客第一個問題就係:「請問邊位訂位?」左丁山答:「 Y小姐。」問:「有冇 initicl?」左丁山愕然,唔知噃,只好答:「唔知!」再問:「有冇電話?」甚麼電話?知客話:「訂位人嘅電話呀?」唉,左丁山仲未見過 Y小姐,未交換名片,點知呀?知客話:「好多客姓 Y,唔知邊位約你,大約一枱有幾多人呀?」弊,又唔知,於是你望我,我望你,僵咗,乜食餐飯都咁鬼麻煩㗎,呢間翠玉軒位於交易廣場,當然日日中午爆滿啦,但論食物,大路貨,一般啫噃,左丁山到呢邊吃中菜,多數係去國金軒,利苑或龍景軒嘅啫。
唔通企在門口不知所措咁儍?唔理個知客咯,行入去搵人,周圍望,一望已望到介紹人歷史 W在座,於是行埋去,一位小姐企起身:「歡迎,我係 YYY」,哦,搞掂,即刻坐低,請佢下次如果再到翠玉軒訂枱,唔該交帶俾秘書聽,或短訊通知,訂位人中英文姓名及留低嘅電話號碼,以免在門口被人盤問成分鐘。
歷史 W話搞咗一個校友旅行團,去東北丹東再到北韓,由丁公新豹帶隊解畫,一上校友會網,三日內就滿額(四十人),二十幾人排隊做後補,想唔到咁多人對北韓有興趣,不過或者丁公夠吸引力啫啩?聽佢講古,特別有趣,帶校友遊墳場,校友都爭住報名啦。

Y小姐話想出版一本香港某題目嘅掌故歷史,問吓左丁山意見,左丁山話:「邊度有人買呢啲書㗎,盞蝕本?」 Y小姐話:「我哋要求唔高嘅,為香港留下一點歷史啫,賣到二千本已經得!」香港圖書市場真細少,寫書好難發達,左丁山年青時發夢過做金庸或者司馬遼太郎,試做過一年文藝青年,為「無名氏」小說著迷,後來俾家中大哥大聲一喝:「讀文史搵唔到錢,我唔會支持你!」於是雖然考大學入學試考到中文 A,中史 A,還是選擇主修經濟學,否則就會做咗歷史 W師弟。 Y小姐既然講得誠懇,於是自己識幾多講幾多,叫佢趕快去訪問幾位八十餘歲嘅前輩,搜集口述歷史資料先!


PermaLink: https://articles.zkiz.com/?id=34047

Next Page

ZKIZ Archives @ 2019