《踩過界》派彩蛋埋伏線？張振朗：諗到乜嘢就乜嘢
1 :
GS(14)@2017-08-17 08:09:44無綫同愛奇藝嘅合拍劇《踩過界》嘅第二季，喺今個月初首播，因為喺內地可以一次過睇晒14集嘅關係，所以喺唔少橋段同結局一早已經穿晒。雖然有唔少觀眾覺得王浩信同朱千雪唔可以再續前緣而感到可惜，亦有人覺得張振朗難得收服咗「夜蒲女王」李佳芯，可惜李佳芯都係被單立文推落山崖，死得可憐。之不過有啲嘢，變幻原是永恒，日前喺愛奇藝上載咗一段短片，聲稱係結局彩蛋驚喜曝光神秘人回歸，話說係王浩信、張振朗同蔡思貝坐喺中環終審法院大樓，先後諗起朱千雪同李佳芯，點知話口未完，李佳芯喺人群中出現，四個人重遇再結伴而行，有網民估唔知係咪舖路拍續集，甚至可能兩個結局。但係近年喺內地劇集，又或者荷李活嘅電影，都會喺片頭片尾派蛋，目的都係送俾觀眾一個驚喜，所以亦有呢個可能性。張振朗接受傳媒訪問，講到彩蛋事件：「雖然我自己都好想拍續集，真係好好玩，但係嗰段片唔係舖路拍續集，亦都唔係第二個結局，唔關事。其實可以話係一個open ending，俾一個空間大家去諗，你諗到乜嘢就乜嘢！」但係根據過往經驗，好以喺第一季許家傑同蔣家旻嗰場禁錮戲，始終香港同內地尺度唔同，有啲鏡頭會作出刪剪，所以呢套劇亦都預告咗香港版同內地版會有啲出入，結局亦未必一樣。
來源:
http://hk.apple.nextmedia.com/entertainment/art/20170817/20123595