《蘭花刼》收視繼續瀉《賭城群英會》預告片似電影？
1 :
GS(14)@2017-06-11 16:09:19無綫嘅4K劇《不懂撒嬌的女人》播完之後，搵咗蘇玉華、田蕊妮同唐寧10年前嘅《蘭花刼》接捧，結果其實唔使多講，睇完一套以高質畫面見稱嘅劇集，一晚之間開住電視機坐時光機返番去10年前，先唔講劇本，淨係講啲畫面同化妝，興趣即刻大減，結果《蘭》劇首周平均收視跌穿2字頭，對比上周《不懂》嘅結局，跌咗10.2點，最高流失達66萬人次，成無綫歷年以來首周收視最低紀錄！《蘭》啱啱先播咗一半左右，呢個禮拜嘅收視仍然慘不忍睹，周一嗰集嘅平均收視有20點(約130萬人次)，點知到咗周二又下跌，平均19點(約123萬人次)，周三同周四嘅平均收視只有17點(約110萬觀眾)同16點(約104萬觀眾)，果然係低處未算低！按照常規，大台已經公佈下一套播映嘅劇，呢套就算本來喺1月出街，但係臨時被抽起，跟住又話喺5月，點知又被二度抽起嘅《賭城群英會》，呢套劇嘅卡士都好勁，有謝賢、劉兆銘、佘詩曼、馬國明、陳百祥同陳法蓉，仲有啲新紥小生、花旦，好似麥明詩同楊明等等，請得郁呢班演員，之唔係靠「賭」食老本食足幾十年嘅王晶囉！噚晚大台喺FB專頁上載咗一條預告片，喺短片一開始見到馬明同阿佘行入賭場，唔知係咪因為佢係賭神接班人，所以佢嘅造型有啲似賭神、又有啲似賭聖，跟住鏡頭一轉見到佢分別同銘Sir、四哥對賭，之後其他主角又有大頭穿插嘅大頭shot，有唔少網民睇完之後，留言問究竟係電影抑或電視？有人覺得成套睇落熟口熟面，有啲似《賭城風雲》嗰一系列嘅feel，甚至亦有人語重心長留言叫大台要繼續努力，做啲多元化節目，要拎多啲錢投資，如果唔係好快會走向亞視後塵！
來源:
http://hk.apple.nextmedia.com/entertainment/art/20170611/20052160