做陳展鵬緋聞女友被爆粗狂鬧單文柔IG變罵戰之地
1 :
GS(14)@2017-06-10 12:23:00儘管話家陣啲fans已經開通好多，對於偶像嘅私生活，包括食煙飲酒夜蒲等都比較睇得開，但一提到拍拖……都唔係咁易過關。好似大台視帝陳展鵬同師妹暨落選港姐單文柔咁，明明已經被《蘋果》影到夜遊山頂，又被《蘋果》讀者透過「爆相爆片」影到「鵬單」鬼祟撐枱腳，另加有周刊指佢哋已達同居階段，雖然表面證供成立，但奈何當事人唔肯企出嚟認，只係有指陳展鵬向公司認愛，仲話自己「一力承擔」，女方都有讚㗎，仲話覺得陳展鵬好慘……其實，慘嘅係邊個呢？單文柔喺被揭戀情後冇幾耐，已經被網民洗版咁去佢啲社交平台留言鬧爆，包括話佢係豬扒，所以單文柔一度關閉咗個留言功能避風頭，唔知佢係咪見已經唔係風頭火勢，最近又開番個留言，點知……喺單文柔近日嘅post中，無論佢講咩，都可以踩中網民嘅神經，「好聽」少少嘅最多話佢同陳展鵬唔襯，難聽嗰啲……其實出唔到街；然後，有啲護單文柔嘅人（包括fans及聲稱唔係fans嘅路人）就互鬧，掀罵戰，正所謂「相嗌唔好口」，啲人就越鬧越難聽，啲留言，唔打格出唔到街嗰種……唔知係咪屬於做「煎Pan嫂」嘅必經訓練，單文柔鬧不還口，佢有冇記喺心入面就唔知，但肯定睇到啲文字組合，個心點都有啲唔舒服……又話一力承擔嘅？學Saving哥話齋，做得到先講得出吖嘛！
來源:
http://hk.apple.nextmedia.com/entertainment/art/20170605/20045101