📖 ZKIZ Archives

長期收息

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20120506/16310676

一年幾之前，一位老友賣咗樓，揸住幾百萬現金，問左丁山有乜好投資，左丁山叫佢若以穩陣收息計，最好用來買 Reit（地產信託投資基金），例如823、2778、778、405之類，尤以823（領匯）為主，至於佢買咗幾多，左丁山當然不便詢問。呢日碰到曾淵 滄博士，講起最近頻頻見報嘅領匯，曾博士話：「舊年老友退休，攞咗一筆退休金，問我點辦，我叫佢全部買晒領匯等收息，依家佢多謝我呀！」曾博士藝高人膽 大，領匯上市時買咗一啲，因配額唔夠多，後來在市場上陸續吸入，依家股價（其實單位價）升到32元左右，直情「財息兼收」啦。
不過曾博士話買領 匯，主要目的係長期收息，唔係賺股價，正如你二十年前用三百萬元買咗層樓，依家升到三千萬，仍然係住在層樓裏面，資本增值只係給你心靈快慰。故此曾博士話 買咗領匯，最好鎖埋不理單位價上升或下跌。但係升到32元以上，周息率得番3.4%左右，仲少過太古之7%，新地3.6%，低唔低呀？曾博士話有點不同， 因為新地等收租股轄下商場普遍已收足市值租金，租金跟着市場循環可升可跌，但領匯有一百幾十個商場，到目前為止，翻新商場比例甚少，而過往房委會管理時 期，商場租值大幅度偏低，與市值租金相差好遠，領匯即使接手後加咗租，仍未追上市值，更何況還有大把商場未翻新，即是未「挖潛」，將來領匯商場之租金總收 入，幾難下跌，即係長期派息有晒保證。

有人講房委會管商場有人情味，保留舊風情喎，曾博士點睇？曾博士話佢做過深水埗委任區議員，視察過距離城市大學不遠嘅南山邨商場街市，睇到冇嘢好講，直情 係上佳房委會管理嘅示範單位，如果大家要懷念房委會舊商場，不妨親自去行吓睇吓，領教三十年不變之破舊。房委會本來可以將啲商場賣俾領匯嘅，但鑑於目前政 治局面，邊度敢賣吖，既然舊商場一切照舊，了無生氣，房委會搵個新商場玩吓，就係油塘「大本型」，聽講內裏絕大部份以市值租金租俾連鎖集團開超級零售店， 留番大約七千幾平方呎租俾中小商戶，以投標方式出租，但建議書佔70%，租金只佔30%，若有意思創業，不妨博一博，分分鐘靠份建議書攞足70分，以二萬 元租金力壓他人出十萬元租金！


PermaLink: https://articles.zkiz.com/?id=33270
Next Page
ZKIZ Archives @ 2019