掛牌 PARTIPRAL 派得好
http://partipral-hk.blogspot.com/2012/04/blog-post_27.html海通證券(6837)今日掛牌上市, 我唔知本BLOG讀者之中多唔多人有抽, 但由於我自己就有, 所以都要交代返少少我既睇法.
海通我抽左2,000股, 當初睇落好似無乜老散玩, 諗住會輕易中哂. 結果最後中籤率都係得60%, 即係中得1,200股, 其實係比想像中少左.
以投資角度黎講, 抽新股並唔合乎自己套路, 自己甚至對新股有陣厭惡感. 因此今次抽海通亦都完全無諗住同佢過人世, 反而純以投機角度出發,
會覺得係幾值得出擊. 結果海通首日上市以險守招股價$10.60作結, 表現似乎麻麻地. 回顧之前自己所講既所謂AH折讓,
明顯並無於上市後立即收窄; 而當初諗住國際配售會獲得重新分配既想法最後亦因為公開發售部份超額兩倍幾而並無實現, 所謂既貨源歸邊有利上升,
似乎係有點一廂情願.
雖然海通上市第一日表現令人失望, 但我覺得又無需要太心急除之而後快. 尤其係中得唔多即係變相縮左注, 心理壓力輕左,
坐長少少我認為可以接受. 當然, 投機永遠一定要有EXIT PLAN, 否則短炒變長渣既話係可以直接通往財務地獄. 正如當初所講,
上下各望10-15%應該係一個頗合理既撤退機制. 除非有合心水換馬對象, 未到價既話, 我認為就不妨繼續渣下先, 暫時計牌面,
我都仲係覺得向上發展機會會較高.
至於其他睇法, 留返過幾日做月結再講.