單線Solo重現江湖謝霆鋒表演用腳熄Cam
1 :
GS(14)@2017-04-12 22:42:37一講謝霆鋒，近排大家都會叫佢做Chef Le Mon，亦會諗起單手開蕉同埋衣架掛意粉。可能大家都遺忘咗，其實霆鋒仲有個身份，就係一個結他手！昨日霆鋒就攞番起支結他拍片，點解呢？原來係佢日前post咗條整麵嘅惡搞片，點知有眼利嘅網民發現片中有支結他，仲問霆鋒支結他係咩型號，睇嚟想買番支向偶像致敬咁喎！就係因為咁，霆鋒就拍條片去講吓支結他係咩來頭，但原來霆鋒只係鍾意儲結他，就唔記得咗支係咩型號，淨係記得喺01年買，同埋個牌子係Ibanez。不過支結他都唔小嘢㗎，全球限量得29支，而結他上嘅圖案係手繪嘅。雖然霆鋒唔記得型號，不過有網民幫佢搵到喇！霆鋒攞起結他又點會齋talk呢？當然要露兩手啦！《活着VIVA》嘅「單線solo」又點少得呢！不過咁，唔好成日笑霆鋒只係識單線solo啦，其實佢都識其他技巧嘅，Bend線、震音加一啲Rock licks佢都識嘅。不過，霆鋒每次出場要chok一吓嘅！正常人開香蕉用雙手，佢就用單手。正常人用手去熄cam，今次佢就用腳趾熄，咁咪夠chok囉！
來源:
http://hk.apple.nextmedia.com/entertainment/art/20170411/19987054