📖 ZKIZ Archives

干預就是好？ 左丁山

http://hk.apple.nextmedia.com/template/apple_sub/art_main.php?&iss_id=20120417&sec_id=12187389&art_id=16253850&cat_id=255&coln_id=22

昨日講及食肆之成本結構，好多時好多人一開口就鬧租金，話租金狂加逼使食肆加價，但業者反而指工資佔成本嘅比重更高。
地 鐵加價，好多市民大罵地鐵賺到盡，加幅超過市民加薪幅度，令普羅大眾苦不堪言，新特首亦話佢會重視地鐵加價，將來要諗吓辦法。睇吓數據呢，「南早」專欄作 家 Jake van der Kemp最鍾意拿出數字與人拗頸，據佢搵到嘅數字，自 1995年至今，香港名義工資（ Nominal Wage）嘅加幅，超過地鐵車費加幅甚多，地鐵如要追上，今年應該加價 20%以上！
不少社會評論員、政客噏得出就噏，甚少提出數字數據，純粹憑 感覺，唔怪得「蘋果」財經版有個專欄要求「寫稿要有理性」，譬如超市加價，必然被罵謀取暴利，超市減價，便被痛罵「掠奪性訂價，趕絕小商戶」，不加不減 呢？王國興議員話超市合謀訂價喎！去年「阿信」平價賣可樂，被傳媒捧為英雄，小企業挑戰霸權。哦，原來「阿信」嘅全年營業額高達五億元，被街坊小商戶指控 佢訂價太便宜，趕絕街坊小店，你話點算好？邊一個啱？
梁特首在北京話過往政府太迷信市場力量，以後政府會適當有為、適當干預。好吖，擺在目前就有領匯租金、超市訂價、阿信低價嘅市場問題，請問政府如何適當干預，唔通要實施物價管制，保證市民要排長龍買蔬果？
地 鐵加價及領匯私有化房委會商場，背後嘅經濟概念係「用者自付」，咁多人鬧地鐵與領匯，即係話好多用家唔肯，唔願，唔制「用者自付」。咁有乜辦法干預？有 嘅，就係政府放棄「用者自付」嘅原則，改用社會主義方式，採取「納稅人津貼制」，以地鐵做例子，即係話要所有其他「成世唔搭地鐵之納稅人」要答應用公帑津 貼地鐵車資，以交換不加價！收購上市公司並不太困難，只要政府以大股東身份，向地鐵提出全面收購，明益小股東就掂，收購後每年政府撥錢俾地鐵津貼車資咪得 囉，引伸落去，全部公共交通國營化，永不加價，人人歡喜，社會主義萬歲！


PermaLink: https://articles.zkiz.com/?id=32849
Next Page
ZKIZ Archives @ 2019