【啟德飛機再現】本土創意飛機 Red Bull飛行日爭住衝落海
1 :
GS(14)@2016-11-27 14:28:24《歡樂天地射牙仔》玩集體回憶。
啟德再有飛機起飛！Red Bull Flugtag飛行日2016會於11月27日於啟德跑道公園舉行，又有一班狂熱份子爭住飛或者衝落海。今次為第三屆，上兩次於2010和2014年舉辦，機會唔係年年有。呢個比賽隔着螢幕睇似鬥跳海多過鬥飛，除咗因為飛機全靠人力推動之外，參賽者都話最緊要開心，造型創意更緊要。比賽前記者去到飛機工場探班，吹氣小丑、Rock味戰車、邊爐、巨型BB乜都有，就係唔似飛機。喺度揀幾部香港人製作發揮本土創意嘅飛機畀大家睇媖，Red Bull呢類瘋狂手作比賽唔係剩係外國玩意，香港人都可以飛得有創意。
歡樂天地射牙仔
受訪者Mokit話佢同朋友已經四度參賽。（兩屆飛行日再加一次Red Bull砌車比賽），每次都是以集體回憶作主題。之前兩部飛機分別以打麻雀和紅白機做主題。上次更加飛出18米遠破了香港紀錄，今次再接再厲用上較輕材料，希望能飛得更遠。主題係歡樂天地，除咗有巨型吹氣小丑，現場表演更係精心準備，暫時畀我哋睇嘅有裝上小丑牙的道具衫和玩具槍，同現場觀眾玩經典射牙仔，仲話到時會有秘密驚喜畀大家。
《Mars Max》大部份材料皆是回收再用。
Mars Max
睇隊名同車身造型，都知是取材自電影《Mad Max》，套戲好狂野，但佢哋就好環保，成部車大部份物料都係回收物品，有車房執返嚟的Audi車頭、烏龍茶樽當引擎零件。不過佢哋就冇整到機翼，預咗飛唔起，連駕駛位都係就咁企上車尾，無懼跳海，最緊要夠型。
《重金屬BB》成員San話要借飛機講社會議題。
重金屬BB
BB都可變飛機，原來係想講鉛水事件調查完冇人跟進，不了了之。製成品打開尿片會係機翼，不過成員們都要返正職，預咗集體生病嚟趕工。
《World of Tim Burton》設計師Gary Tang指將插畫立體化最大難度。
World of Tim Burton
這隊團隊剛為大導演Tim Burton搞展覽，睇架車認唔到？其實設計者想大家認識T im Burton電影以外一面，呢個綠波波叫羅密歐，來自Tim Burton畫的插畫，講佢係一座山，遇上來自大海的朱麗葉，羅密歐變飛機跳海就好match了。
OutSign.Lab當日會作表演嘉賓和評判。
OutSign.Lab
上兩屆冠軍，因為太屈機變評判同示範嘉賓，今次夾埋「玩爆你個腎」Kevin Boy做機師，講明都拎唔到獎，但求玩得開心，團隊預告架太空戰鬥機會爆出驚喜。Sam同Soto兩位評判話比賽分三個評分準則，最緊要創意，跟住係現場表演，最後先係飛行距離。
記者：司徒港燊攝影：周芝瑩、劉永發
來源:
http://hk.apple.nextmedia.com/su ... t/20161127/19846730