傳另一半有紅顏知己 故發放情書消毒林鄭：百分之二百信任丈夫
1 :
GS(14)@2017-03-04 00:23:42■林兆波曾在fb公開發表給林鄭月娥的情書。資料圖片
【特首戰開打】【《蘋果》專訪】【本報訊】提名期結束後，特首戰進入新階段，隨之而來是傳言滿天飛，林鄭月娥昨接受《蘋果》訪問時坦承聽聞政界流傳其夫林兆波有紅顏知己，稱丈夫因此「先發制人」，在情人節公開給她的情書，助她為負面新聞消毒，她對丈夫派定心丸：「我對我先生係百分之二百嘅信任」。挾580提名入閘的她指，有信心不會在投票時走票、甚至獲泛民支持。記者：呂浩然 林俊謙獲建制派選委公開提名支持的林鄭，特首選戰暫佔上風，但外界甚至對手曾俊華深信投暗票時，會有建制選委轉而挺曾，令林鄭有走票危機。林鄭昨被問及走票情況時，相當肯定地稱：「呢啲朋友大部份提名我呢，我都識㗎，亦都係好多年有交往、有合作，咁所以我係有呢個信心（不會走票）。」
指有信心獲泛民支持
林鄭日前接受傳媒訪問時，曾提及有信心投暗票時能獲民主派支持，她昨日就此解釋：「佢（民主派）冇應承話一定投票，但佢話我同佢哋會面嘅時候，係畀佢感覺到我好掌握佢哋關心嘅事，甚至有個講話，我講出咗佢哋嘅心聲。」她特別以教育界這個民主派陣地作說明，指其發表政綱後，分別有老師和校長向她指，對其政綱列明要為教師提供穩定的教學環境，及增加每年50億元的教育經常開支流淚，這些反令她感到，「除非屬於教育界嘅選委喺投票嘅時候，仍然係政治立場為主，否則我都希望佢哋諗番呢個長期佢哋積壓咗嘅問題，係有機會可以解決」，並承諾就算教育界選委不支持她，若當選也照樣履行承諾。雖然對選情有信心，但林鄭明言，除非一些突變因素，打亂選委對她的支持；事實上政圈近日亦流傳有關林鄭的傳言，記者昨問起有否聽過有關其家人的傳聞時，林鄭不諱言：「我係聽到有人話畀我聽，係會有呢啲不斷抹黑嘅工作進行緊。」記者還未明言傳聞內容，林鄭主動道出：「有人會問你先生咁低調，做乜突然間高調喺情人節做一封信呢？就因為嗰日之前兩、三日，有人話畀我哋聽，有人做緊一啲抹黑嘅材料，話我先生有紅顏知己。」
「做嚟做去呢啲古仔」
她甚至解釋傳聞的背景，「因為長期你兩夫婦分開喎，佢喺英國、你喺香港，冇理由一個男人喺英國會冇呢啲嘢」，續指：「我先生都覺得，與其俾人報咗、作咗、報咗、抹黑咗，咁佢話，不如我先發制人講咗其實我好支持你，我亦都好愛你，所以係咁樣樣（情人節在fb公開發表當中提及關一國兩制的情書）。」林鄭強調她早聽過此傳聞，因為很多人關心特首選舉，不同人聽到不同風聲都會告訴她，她有點不以為然稱：「似乎做嚟做去都係呢啲古仔。」被問夫婦間感情有否受影響？林鄭稱不想多談私事，但向丈夫派定心丸：「你（記者）既然問開，咁我就話畀你聽，順便喺你個報道裏面話：我對我先生係百分之二百嘅信任，我哋都結婚卅幾年，咁所以唔會喺呢場選舉裏面係可以俾人造謠」。
來源:
http://hk.apple.nextmedia.com/news/art/20170303/19946091