做建材出身 稱工程股「得啖笑」
1 :
GS(14)@2017-02-05 10:47:08【本報訊】郭釗自小在旺角龍蛇混雜之地長大，投身「偏偏哋」的建材工程行業亦交過寶貴學費，眼見現時建築工程股貴為新股市場主要貨源，這名行家不諱言不少僅「得啖笑」。最近兩年的創業板新股中，約四成為工業股，平均集資9至10億元，上市後多數升勢、波幅驚人，「翠如BB股」聯旺（8217）更是表表者。郭釗指，要滿足現時的上市條件，對於有一定規模的工程公司易如反掌，接三四單大工程、保持兩年業績已做到，「所謂建材工程股，嗰啲公司得啖笑，係殼股之嘛。」身邊不少白手興家的友人正籌備上市，「見佢個頭痕到乜咁，瞓都瞓唔着，屋企有仔女都唔得閒返去睇，成日出去應酬，飲到豬頭炳咁，自己身體又唔好，又痛風，為乜呢？我個個月去旅行好過啦。」行內打滾廿年，郭釗指外人難理解工程界生存之道，就算做妥手頭工作，收錢卻要各顯神通。「唔明？工程界係有少少……點講呢？偏偏哋。總之你要搵方法，唔係搵收數佬，你要有啲方法去收錢。例如留啲手尾唔好做住，咁先會收到錢。」郭釗笑言打工仔、甚至其他行業的老闆都難以明白，一句到尾，做工程除了要手瓜夠粗，「長期都係鬥智鬥力」。既然行頭難撈，難怪行家稍有規模就籌備上市覓後路，以郭釗人脈不可能沒人敲過門，但他自嘲無大志，「我唔主張做大間公司」，生怕要考慮手下員工生計，反而束縛自己。人各有志，郭釗自覺若要去政商名流的應酬場合，自己只是一個「small potato，又要對住人地擺哂尾咁，我唔鍾意做呢啲嘢，情願生活得舒舒服服。」記者：黃翹恩、陳家恩
來源:
http://hk.apple.nextmedia.com/financeestate/art/20170204/19917730