ZKIZ Archives


2016年網民最討厭藝人G.E.M.大比數蟬聯冠軍

1 : GS(14)@2017-01-31 16:01:53

好多時都會見到網民搞啲「最喜愛藝人」、「最喜愛歌手」等等咁,不過好似電影咁,有好睇就會有爛,有最喜愛就有最討厭,所以網絡紅人「King Jer娛樂台」就搞咗個「2016年網民最討厭藝人」選舉,昨日更公佈結果喇!今屆嘅最討厭藝人第一位,就係由上屆冠軍宇宙巨G.E.M.鄧紫棋蟬聯,以15,297票當選,之前宇宙巨G.E.M.就話今年計劃出廣東歌,但呢個票數……睇嚟網民唔多歡迎喇。大家千祈唔好以為宇宙巨G.E.M.勝出呢個比賽係一件難事,因為睇佢同第二名吳若希嘅9,640票數嘅差距,就知宇宙巨G.E.M.呢個「2016年網民最討厭藝人」簡直係手到拿來、輕而易舉。但第二位之後嘅票數就好激烈喇,吳若希只係勝過第三名王晶9,177票463票,輸個馬鼻。不過王晶其實算係保持到,因為上年嘅呢一個選舉,佢都係排行第三。第四位嘅梁烈唯就下跌唔少,上年佢只係輸畀宇宙巨G.E.M.30幾票,今年就以7,662票屈居第四,三甲不入。其後嘅排名分別有:第五名周永恒(7,274票)、第六名吳業坤(6,923票)、第七名蔡思貝(6,130票)、第八名王祖藍(5,909票)、第九名蘇永康(5,834票)、第十名陳凱琳(4,738票),第六至第十位嘅藝人,都係今年新上榜,但可惜搶唔到頭五位,出年要再加油先得,唔知宇宙巨G.E.M.出年會唔會再一次蟬聯呢?資料來源:King Jer娛樂台




來源: http://hk.apple.nextmedia.com/entertainment/art/20170131/19913624
PermaLink: https://articles.zkiz.com/?id=324809

Next Page

ZKIZ Archives @ 2019