【馮仁昭四圍超】下月做老竇Tommy唔認大肚老婆
1 :
GS(14)@2017-01-21 03:36:49■Tommy（右二）噚日同E-kids隊友出席演唱會記招，提起老婆又扮儍。
組合E-kids成員阮民安（Tommy）上月被爆同大肚女友張倚雯（Eva）秘婚，但被問到婚訊就玩神秘，不過日前佢嘅大肚老婆終曝光，下月生得嘅Eva陪Tommy到中環Gucci血拼，臨盆在即仍染粉紅髮，一身粉紅look搶眼過戴黑超嘅Tommy。
■Tommy同肚大如籮嘅老婆日前去中環行街。
■任達華（右）咁啱喺店內，Tommy夫婦即把握機會集郵。
向譚詠麟道歉
剛巧任達華同老婆琦琦都喺店內，Tommy見到華哥主動打招呼，又向華哥抄牌攞電話、合照同擁抱，之後華哥夫婦拖手恩愛離去。Tommy喺店內試衫褲又試鞋，買咗一大袋戰利品，離去時同Eva行到離行離列，同華哥夫婦嘅十指緊扣好大對比。事後Tommy喺電話繼續死口唔認做咗人夫：「嗰日同形象指導Eva去揀衫，因為想做場好好睇演唱會，等咗超過14年，我絕對唔係富貴，仍係貧困歌星仔，去名店買衫咁大膽係因為想回饋歌迷，我哋三個自願唔收歌酬，將錢放晒製作同衫上面，希望大家記得香港有隊組合叫E-kids。咁啱撞到華哥，我哋合作過電影《PTU》，佢係好好前輩，所以交換番電話，希望可以搵佢幫手做少少嘢。」此外，E-kids噚日喺灣仔為演唱會舉行記招，譚詠麟（譚校長）錄咗段片為佢哋打氣，Tommy話有段時間令校長失望，一直想搵機會道歉。問到老婆Eva會否捧場？Tommy扮儍說：「邊個Eva？嗰個KOL，佢好多人follow，睇吓邀唔邀請到。」撰文：馮仁昭
來源:
http://hk.apple.nextmedia.com/entertainment/art/20170120/19902578