全心照顧父母孝順女康華嘆姻緣難求
1 :
GS(14)@2017-01-18 08:04:2845歲嘅康華仍然係單身貴族，不過父母同身邊朋友都憂心佢嫁唔出，去年楊怡結婚刻意拋花球畀佢，早前更有雜誌指康華媽媽帶阿女相睇。前日康華回覆傳媒時未有否認，只話﹕「一直都有人介紹拍拖，但父母年紀大，應該擺第一位，拍拖就唔會照顧到佢哋，我o依家逢周六、日都一定陪佢哋，如果做嘢，但夾啱時間都會陪佢哋睇醫生，爸爸喺呢年幾做過三次手術，我唔帶佢哋去睇(醫生)就唔會去睇，要人篤住食藥，試問有邊個男人拍拖會陪住老人家㗎？！」康華7歲就同屋企人由大陸移居香港，哥哥o依家大部份時間都留喺大陸，照顧年過80歲嘅父母責任就落喺康華身上。康華係出名孝順女，曾經喺一次雜誌訪問中透露為慳錢照顧父母，會喺片場攞多個飯盒留下一餐食。問康華o依家經濟好唔好啲？佢話﹕「前幾年喺大陸搵到，但賺到都用嚟畀醫藥費，因為爸爸做通波仔手術都幾貴吓，但錢財身外物，講起都算好彩，有次喺大陸做完嘢返嚟見爸爸個嘴歪咗，先知佢有中風跡象，算係發現得早。」康華慨嘆自己同父母年紀都大，佢話﹕「仲有幾多年吖，真係要珍惜呢幾年呀！」問到係咪真係冇諗結婚？佢笑笑口話﹕「哈哈，勉強唔到嘅，隨緣啦！相士話我2019年要好好把最後一次機會，我都會加油！」
來源:
http://hk.apple.nextmedia.com/entertainment/art/20170117/19899871