被指為富豪產子賺千萬利智懸賞億元尋真相
1 :
GS(14)@2017-01-12 08:08:28想當年嘅利智，除咗身材成為茶餘飯後嘅話題之外，其實多年來，喺娛樂圈一直流傳住一個未經證實嘅傳聞——指利智曾收取千萬元酬勞為富豪產子。一向低調嘅利智，於1997年9月3日，突然向港台傳媒發表一份佢自己署名嘅聲明，就有傳媒指佢投資失利、樓盤變廢墟嘅報道中提及該（收錢產子）傳言，利智否認之餘，更以「十倍的價格」，即一億港元懸賞，尋找任何一個可以證實這個傳言嘅人；同時，利智更附上一張由中南銀行發出嘅信貸額證明書影印本。於1986年捧得亞姐冠軍嘅利智喺嗰份聲明中提到：「自92年起，我離開了演藝圈，我自知自己缺少演藝天份，更為了避免媒體追逐，去尋找一份淡泊平靜的生活。五年來，我盡量保持低調，盡力婉拒公開露面，即使面對各種利益的調惑也毫不動心。（中略）「特別令人難以容忍的是，該專版以個人檔案的形式引用『以千萬元代價富豪產子』的謠言，這是對我個人莫大的誹謗和侮辱。至今謠言有各種不同的說法，其主角和價碼也各有不同。在這裏我要鄭重聲明：至今我未能有這樣一份榮幸，成為這個地球上的任何一個孩子的母親。我將以十倍的價格懸賞任何一個可以證實這個謠言的人。」另一單關於利智嘅大新聞，就係佢曾經因為呷醋，而離家出走。根據李連杰好友、向華強太太陳嵐喺2006年5月於《蘋果日報》刊登嘅專欄《嵐言之隱》中，曾提及某年關之琳同李連杰合演中國星一套電影，就喺拍宣傳海報當日，之之喺其中一個甫士中，隨意將手肘放喺李連杰膊頭，張海報見街後，利智呷醋離家出走。愛利智深切嘅李連杰發晒「茅」，最後要向太出手幫佢勸番利智返嚟，而李連杰更加係變成「女人勿近」。
來源:
http://hk.apple.nextmedia.com/entertainment/art/20170112/19893833