📖 ZKIZ Archives

賓架怕黑 左丁山

2012-03-25  AD

大賓架請去 IFC食壽司，欣然赴約。 IFC啲食肆真好生意，中午時分，見到幾間都有人龍排到出門口，各色人種齊集， IFC可能係香港最國際化嘅地方，唔淨止聽到英語，普通話或廣東話。
壽 司就無謂評論嘞，環境就非常好。左丁山醒起大賓架曾因雷曼事件俾人質詢到暈，眨眼間過咗四年，立法會雷曼小組委員會仍未能交出調查報告，而美國股市已創出 金融海嘯後新高，特登問大賓架：「假如今日你再被質詢，你會點樣答？」大賓架話：「我最近學到啲好嘢，記者或議員問我雷曼迷債有否害人，銀行點解銷售，銀 行職員有冇呃老人家嘅話，我會答：（一）我唔知，我唔清楚；（二）我間銀行咁大，我好難知道下屬與客戶談話嘅詳情；（三）我負責整個地區，前線銷售人員嘅 銷售手法我唔管得咁細緻！」
咦，乜咁醒目嘅，但答案好熟噃，未諗通，大賓架已經指住左丁山大笑，左丁山明白佢嘅意思，亦笑住講：「下次有立法會議 員請你到立法會答問，你夠唔夠膽講：我唔記得。我唔知。我間公司好大好多人呀？」大賓架伸一伸條脷出來，用筷子夾上燒牛脷：「食啦你，去到立法會咁樣講， 形同自殺！」唔係噃，或者有人做咗特首之後，到立法會出席答問大會又係用呢一招「我唔知，我唔記得，唔關我事呢。」
講番嚴肅事，大賓架話佢地行家 好擔心特首選情，行家不滿意唐生不及時為僭建案拆彈，但傳出梁營與上海仔嘅關係後，金融行家更加驚，梁營死士劉夢熊在金融界無地位無甚影響力，基本上無人 理會他，但佢在鏡頭前大讚「郭先生功在國家，何俊仁之流望塵莫及」之後，說明佢與「上海仔」嘅關係非比尋常，簡直係十分友好，否則邊會在北京公然公開為江 湖人物面上貼金嘅啫。觀其人，先觀其友，正是物以類聚，劉梁 friend過打 band，金融界商界選委怎能不生疑慮？賓架最討厭 uncertainty（不穩定性），大賓架話假如梁生上台確係幾令人疑慮重重。呢點左丁山明白嘅，挺梁人士中，諗唔到有邊幾位係金融界高手，可以為梁生 鎮住個場！


PermaLink: https://articles.zkiz.com/?id=32102
Next Page
ZKIZ Archives @ 2019