【動大事2016】黎天王成化解公關災難之神「天下第一關」出局
1 :
GS(14)@2016-12-28 08:12:202016年關公真係好忙，因為每次有公關災難，網民都會叫阿關公出嚟幫幫手，咁啱2016年又真係好多公關災難，次次都大大鑊。首先係有「天下第一關」之稱嘅鄭紹康嘅公關災難喇，喺九月嘅時候，陳子聰病癒相流出，之後蘇永康暗示鄭紹康盜用徐濠縈IG嘅陳子聰相，兩個就隔空互片，喺年尾何超瓊重組天機公關，鄭紹康被踢出局。而事件嘅另一主角蘇永康，喺暗示完鄭紹康之後，自己都引法咗公關災難，喺12月嘅時候，蘇永康宣佈老婆有咗BB，講到對自己小朋友嘅期待，佢就話：「我唔想生個梁天恆(梁頌恆)，我唔想生個游蕙禎，我要佢識分莊閒，你可以反叛，但絕對唔可以做啲背祖忘宗分裂國家嘅事情。」就係呢番言論，引嚟公關災難。
Viu TV今年4月開始，一年都未夠，已經引發咗唔少公關災難，第一係《跟住矛盾去旅行》嘅第二輯，其中一部份係王丹同馮敬恩去日本，但突然之間ViuTV發聲明話二人舉行記招「宣揚港獨」，借機宣佈抽起唔播，釀成一場關公災難。ViuTV早前喺免費電視直播全港首屆「電動房車挑戰賽」，點知播到最後兩圈就變咗播新聞，畀網民喺facebook勁鬧，引發「關公災難」。除咗VIU之後，都有大品牌發生過公關災難，有護膚品品牌原喺5月底，公佈邀請何韻詩合辦小型音樂會，但後來急發聲明，重申何韻詩並非代言人，仲單方面以安全因素為由取消音樂會，原因受到大陸網民媒體怪責…當時唔少香港網民聲稱杯葛品牌。今年7月嘅時候，周秀娜都引過公關災難，當時全城期待《Pokemon Go》喺26號推出，但娜姐就話喺20號就有得玩，到咗20號，娜姐所講嘅有得玩，原來只係直播佢扮比卡超喺商場走嚟走去，條直播仲吸咗6000幾個嬲嬲，最後娜姐都有出嚟道歉。不過今年公關除咗災難之外，都有化解公關嘅高手，講緊嘅就黎明黎天王喇，4月中喺中環開騷，頭場臨開場﹐政府突發出公告，表示因不符合消防安全的規定，所以第一場演唱會開唔成，之後黎天王好快咁化解咗呢個災難，就係交待、認錯、道歉，好多時其實就係咁簡單，希望新嘅一年，大家可以學下黎天王嘅解決方法。
來源:
http://hk.apple.nextmedia.com/entertainment/art/20161228/19879247