ZKIZ Archives


80後工程師首攻選委抗赤化

1 : GS(14)@2016-11-29 00:03:44

【本報訊】就像普遍市民,2012年特首唐梁決,現為港鐵二級建造工程師(土木)的張振傑只在場外「食花生」,「當時唔覺對切身影響好大,佢哋有乜政綱都冇睇過」。香港在梁振英當選特首後急速赤化,令原本政治冷感的年輕工程師,一鼓作氣闖進工程界選委會,冀以選票擋住兩制下的「紅」線別過界。「我哋有嘅係自由意志!」團隊另一成員是現為高級工程師麥雪晶表明若手持特首票,勢必代表港人意願。


「特首唔係一味聽從中央」


「我對呢屆特首或者係成個政府,都頗有意見」。28歲的張振傑,4年前對政治興趣近乎零,如上屆特首選舉,「冇參與嘅權利,年輕人都冇份玩……都係剝吓花生」。梁振英當選後,反國教與爭取港視發牌運動,他都參與其中,令他警覺的是「(梁治下)赤化問題好嚴重」。之後傘運,縱使成效不彰,卻給他啟示,「其實肯犧牲、肯出嚟表達對政府嘅不滿,係要好大勇氣……如果唔正視呢班人嘅意見,後果係好嚴重」。去年區議會選舉,他蠢蠢欲動,選區最終有民主派出戰,才打消披甲念頭,將選戰第一次獻給負責選特首的選委會,「工程界比較難有機會畀年輕工程師表達意見,希望我有機會將佢哋嘅聲音帶出嚟」。相較之下,33歲的麥雪晶,政治醒覺更早,「03、04年(23條立法前後)啱啱入大學,嗰時好大衝擊,覺得香港原本嘅制度被侵蝕,自由又受影響」。六四與七一外,傘運亦支持,雖然表達的意見未必獲政府接納,「但令人覺得有必要發聲,唔可以逆來順受」。2012年特首選舉更令麥雪晶記憶猶新,「上屆見到好多人(選委),係冇自由意志,主要支持唐唐(唐英年)嘅,後來唔知受咗乜嘢啟示轉咗去梁營嗰邊」。像她這樣一代的工程師,不少冀盼香港有普選,隨着人大8.31決定粉碎素願,能冀望的只剩有份選特首的選委。與其交託別人,不如挺身而出,若然當選,表明按自由意志投票,「我係代表香港某啲人意願,唔係代表某啲人嘅心意、亦唔係聽邊一個人嘅指示」。民主派今屆組成「進步工程」團隊參選工程界選委會,20人中包括麥雪晶、張振傑兩名首戰族;不支持梁連任,要求人人平等。麥雪晶期望新特首以香港發展為先,「唔係一味聽中央意見或主動迎合」,並保存香港的優良制度,多聽市民意見,「而家嘅特首似乎做唔到海納百川,反而令到社會好分化」。張振傑冀未來特首施政時優先考慮香港而非中國,「香港係高度自治,冇理由為配合中央某啲政策夾硬去推一啲嘢出嚟」,嘆幾年來中港融合太快,「4年前冇人知本土派係乜……其實係大家覺得被侵蝕;雖然係中國一部份,但唔應該被視為同中國完全一樣,最重要保存香港獨特性」。■記者許偉賢




來源: http://hk.apple.nextmedia.com/news/art/20161128/19848149
PermaLink: https://articles.zkiz.com/?id=317309

Next Page

ZKIZ Archives @ 2019