財經評論：三個字總結新辣招
1 :
GS(14)@2016-11-18 17:22:04樓市新辣招實行了差不多兩星期，但一、二手樓價很少聽到大跌價，就連劏房盤Ava55於出招後一星期賣樓，一個晚上都賣了差不多40間，大業主盧華幾個鐘之內吸金1.6億元。區區億幾，對發展商來講絕對唔係咩大數目，但已經足夠摑特區政府一大巴。仲記得賣樓前一晚，有好幾個前線地產代理都不太看好銷情，直言「賣到廿間都算偷笑」，結果比市場預期多了一大截，反映市場根本無懼那個所謂的新辣稅。最抵死嘅係，其中一名買家好霸氣咁同傳媒講，對於新辣稅冇咩感覺，最緊要自己唔使畀，就算自己有樓，今次用未買過樓的老公名買，辣稅？咩嚟㗎？食得㗎？簡單一招已成功避稅。
CY一直話房屋供應是「重中之重」的工作，但由2012年7月上任至今四年四個月，香港樓價就升足差不多四成。翻查中原城市領先指數（CCL）紀錄，2012年7月初為105點左右，而最新指數超過143點，升了36.2%。至於2015年9月的歷史高位為146.92點，即是現今CCL距離最高位只有2.6%左右。更諷刺的是，對比往時出新辣招，樓價短期都叫回落幾個巴仙，之後再升番；但今次新DSD連回落幾個巴仙的日子都唔見，隨便搵單二手成交，同類單位出招後貴過出招前，連二、三線屋苑亦然。好似荃灣荃景花園一個高層495方呎單位，最新成交520萬元。然而，上月成交過同座同戶型單位只是506萬元，即出招後成交比上次同類單位高14萬元或2.8%。三個字總結今次新辣招，冇！料！到！記者：黃嘉銘
來源:
http://hk.apple.nextmedia.com/financeestate/art/20161118/19837296