【一本簿、一支筆】漫畫「偽」術亂世中的港式快樂
1 :
GS(14)@2016-10-26 08:03:07唔好睇少o依個《孫悟空》，佢吸引咗超過七百萬網民嘅目光！
最近，一幅以龍珠孫悟空為主題嘅畫作，喺網上有超過七百萬人睇過、十六萬人share，唔止係畫漫畫人物咁簡單，細心啲睇，係畫中畫！悟空裡面隱藏咗好多角色，包括佢老婆芝芝、龜仙人同無閑等等。呢幅畫唔係由邊位日本畫家創作，而係出自香港人！本地畫家Ah Leung對於網上嘅熱烈反應非常開心，「原來呢個世界好多人鍾意龍珠！悟空帶畀我喺畫畫上嘅大轉變，就係當中嘅思考同幻想力。細個時覺得畫人物嘅眼睛好複雜，跟住我發覺唔係喎，其實悟空嘅眼睛係一粒豆豉加個圈。」從來無拜師學畫嘅佢自此更放膽畫畫，一路自學至今。
除咗《龍珠》，本地畫家Ah Leung亦係日本經典漫畫《相聚一刻》同《橙路》嘅粉絲。
2003年沙士期間係Ah Leung最低潮嘅時間，佢甚至出走到紐約，不過始終覺得香港最好。
Ah Leung欣賞上一代香港人勤奮精神，又鼓勵大家就算機會渺茫亦唔好放棄。
現實香港充斥住語言「偽」術，Ah Leung描繪嘅可以話係圖像「偽」術，打正旗號話畀人知係「不誠實紀綠」。除咗悟空、黑武士等大家熟悉嘅漫畫人物，喺Ah Leung筆下出現得更多嘅係香港。佢有畫自己土生土長嘅西營盤，仲沿住港鐵港島線描繪唔同地方，之後「進攻」九龍，參考九龍壁畫法，將九個九龍地區化成九條龍。作品未必係色彩斑斕，但係齊集舊香港嘅特色同人情味，好似各種舊式小店、左鄰右舍交流嘅場面、掛滿招牌嘅港式地道街景。問到新舊香港嘅分別，Ah Leung話：「我鍾意舊香港多啲，o依家嚟嚟去去都係好多間7-11、地產舖；小店有佢嘅生存空間，營運到就應該繼續營運落去，無必要作出犠牲。」佢感慨近年香港環境較亂，坦承畫畫過程可以令佢暫時逃離現實世界嘅不快樂，並希望借一本簿、一支筆令觀眾忘憂，「我盡量都會擺啲好寬容、快樂嘅元素落作品，希望喺比較亂，無咁開心嘅時刻，帶歡樂同正能量畀大家。」
細睇Ah Leung筆下嘅黑武士，原來裏面都係香港地道街景，估你唔到喎。（受訪者提供照片）
Ah Leung最近以哥哥張國榮為主題創作，描繪哥哥曾經演出嘅經典電影角色。（受訪者提供照片）
崩牙係Ah Leung嘅標誌，佢最想同人分享嘅，就係快樂。（受訪者提供照片）
Ah Leung認為現今唔少港人都係「搵完食先搵夢想」，過程容易令人迷失，而佢自己就選擇堅持理想。縱使條路唔易行，戶口試過只有幾千蚊，義務畫插畫都冇人要，不過好彩沿路有太太撐住，最後捱出頭，成功同公司簽約，有機會同唔同品牌合作，兼做平面設計師。雖然現時收入只可用「糊口」嚟形容，但係Ah Leung一啲都唔介意，「做自己喜歡嘅事，就係一種快樂！」
Ah Leung喺西營盤長大，仲話o依度居民會叫海味街做鹹魚欄，你又聽過未？（受訪者提供照片）
《九龍》系列以九龍壁為靈感，真係幾有氣勢。（受訪者提供照片）
採訪：何宛珊(表妹)攝影：馮峰、Neo後期：Roy編審：仙編導：Kaman、懷鈺
來源:
http://hk.apple.nextmedia.com/entertainment/art/20161026/19811962