【首爾直擊】坐《屍殺列車》釜山行過隧道逃生堅定流？
1 :
GS(14)@2016-09-28 05:04:32食住《屍殺列車》個勢，動畫版喺上禮拜都上畫。（《屍殺前傳:首爾站》截圖）
韓國電影《屍殺列車》喺香港票房突破六千萬，食住個勢，上禮拜動畫《屍殺前傳:首爾站》亦終於上畫。睇完兩套戲有後遺症？去首爾或釜山玩，甚至搭KTX都怯怯地？動主播阿仙一於身先士卒，帶你哋一齊「仙遊列車」！想去釜山玩有兩個方法，一係由香港搭飛機直達釜山，二係由首爾坐KTX過去。揀坐KTX嘅朋友，第一個驚嚇位就係，見到喺車箱行嚟行去嘅藍色衫服務員姐姐。戲中嘅服務員姐姐係第一個畀喪屍咬，現實中嘅服務員日日都要搭KTX，又敢唔敢睇《屍殺列車》呢？其中一個服務員姐姐勁有禮貌，笑住咁答我哋：「有睇呀！」，仲話唔係好驚添！
阿仙驚住咁搭KTX由首爾去釜山，帶大家一齊「仙遊列車」。
車上第一個驚嚇位就係見到藍色衫服務員姐姐！
問服務員姐姐有冇睇《屍殺列車》，佢笑住咁話有，仲話唔驚添！
坐KTX由首爾去釜山車程約3個鐘，如果真係有喪屍，戲中幾招可唔可以自救？首先，要識閂門！一般車卡門都係自動式，開門後約7秒先完全閂晒，所以記得學戲中男主角孔劉咁，撳門上方嘅紅色制，先可以隨意開關。第二，入廁所避難。部份車卡與車卡之間設有男女廁，不過面積唔大，如果身形嬌小都可以迫入4-5人。車卡之間除咗有廁所，仲有一張凳，戲中孔劉就喺呢張獨立凳，同囡囡情深對話。原來現實中，呢張凳係畀票務員，或者買無劃位車票嘅乘客坐。
想喺KTX避喪屍，第一招梗係閂門，記得撳門頂嘅紅色制，唔係自動門閂得好慢。
第二招，入廁所避難，廁所好細，係就早啲霸位！
第三，趁過隧道嗰陣，車箱一黑，喪屍睇唔到然後走佬。全程車442公里，原來都經過超過二十條隧道，不過好多都係十幾秒就過咗，究竟超過一分鐘、有足夠時間逃生嘅隧道又有幾多條？即刻去片話你知！
戲中嗰張催淚凳，究竟畀邊個坐？
同埋有幾多條隧道畀你走佬？即刻去片！
「小貼士」坐KTX由首爾去釜山，單程車票正價要₩59,800(約HK$420)，來回約HK$840。遊客可以買優惠套票，如果2-5人同行，可以買SAVER PASS，即係全日通車票，一日票價₩72,000(約HK$500)。SAVER PASS可以喺網上訂票，然後帶同護照正本去首爾站換票。主持：阿仙、Ruby記者：鄒倩婷繙譯：卓惠媛（Joyce）剪接：Roy攝影：李錦鏵導演：陳家文
來源:
http://hk.apple.nextmedia.com/entertainment/art/20160928/19783669