陀仔有賞唔畀撒賴陳琪催老公 獎十卡鑽戒
1 :
GS(14)@2016-08-21 08:11:07懷孕7個多月的陳琪昨日帶住兩個囡囡胡芷苓和胡芷悠，到九展出席「妖怪手錶舞台劇」記者會，同場還有前女子組合Freeze成員陳樂榣與1歲零3個月大囡囡Aria，以及「美心妹妹」胡梓盈等。
胡諾言 資料圖片
「成個足球小將」
陳琪笑言昨日沒有「阿四爹哋」胡諾言在身邊，一個人湊兩個女有點吃力，她說：「由上車嘈到落車，不過細女好識賣口乖，成日扶住我又叫我小心啲，每次叫我買玩具嗰時仲會講好多次『I love you』。」今胎一償所願陀仔，陳琪直言老公最開心，她說：「囝囝踢咗我成晚，成個足球小將咁，爸爸話將來可以帶佢去踢足球，我話畀佢恨到囉。不過我都好蠢，以前明知生女，但都要問醫生係仔定女，今次唔使問嘞！」陳琪透露已為囝囝改了英文名叫Jayden，中文名則待出世後夾時辰八字，她說：「老公最近鍾意咗個女仔，佢用咗其中一個字，我唔呷醋嘅。」問到老公有甚麼獎勵？她說：「老公以前呃我話送十卡鑽石戒指，話生仔先有，而家生仔佢又扮聽唔到，女人有隻鑽戒好開心嘛。反而兩個家姐成日話要買禮物畀細佬，大女仲話要學抹地㖭。」問會否餵人奶？她說：「試吓，但之前唔夠奶，有朋友因為咁而唔開心，但我唔會逼得自己太緊。」
陳樂榣女30磅
一直餵哺母乳的陳樂榣讚好處多，她說：「囡囡30磅屬大隻BB，餵人奶小朋友真係醒目啲，女仔嚟講又快熟啲，有時整蠱佢仲識告狀。」曾有餵人奶媽媽受到歧視，她說：「自己豁出去，最重要得家人支持，但都聽過人話要遊的士河餵母乳，咁好辛苦，所以嚟緊自己會將間飾物店擴充，預留地方餵母乳。」採訪、攝影：盧妹
■陳樂榣堅持餵哺母乳到囡囡兩歲，等囡囡更健康精靈。
■美心妹妹胡梓盈（左）和陳樂榣囡囡Aria昨日一齊出席活動。
來源:
http://hk.apple.nextmedia.com/entertainment/art/20160821/19744104