二手癲價勢推高新盤價
1 :
GS(14)@2016-08-16 04:52:34【拆局】近期樓市絕對可以用峯迴路轉形容，樓價於去年9月見頂後，至今年3月便見底，期間樓價未有如一眾專家所言大跌兩、三成，只跌約一成便急速反彈。錯過低位撈貨的買家，眼見樓價不跌反升，心儀的盤源亦一個個賣去，開始變得焦急，恐遲買更貴的羊群心理下，將所有樓市負能量轉化為正能量，心急追貨，造成近期二手樓價出現越搶越貴情況。難得有一班像前世未買過樓的樓民盲搶入市，業主當然有殺錯冇放過，明明開價500萬元，地產代理見已有客出到價，可以即時落票，業主仍然「玩嘢」，指昨天才是500萬元，隔日已不是，即反價至520萬元，「你唔買，仲有大把人爭住買，我唔急㗎」!惟市場缺盤，這間不買，下一間叫價可能更癲，相比下，這間已算是筍盤，買家只好肉隨砧板上，畀業主任劏。近日聽過有地產代理說，青衣有買家睇樓4個月，由430萬元不買，睇到480萬元才買，當初不信樓價會升，最後樓價升到連他自己都驚，有平不買，偏偏畀貴50萬元才買，代理都忍不住鬧這名客人「抵佢死」。
Grand Yoho定價受關注
由於新盤定價都是參考二手，隨着二手價癲，發展商想平價賣樓都不行，因此相信短期內開售的新盤勢開價更狼。事實上，近期「四叔」李兆基旗下的恒地（012）多個貨尾封盤加價。新地（016）有機會在本周內開價的元朗Grand Yoho，定價備受關注。沙田第一城呎價都升到1.4萬元，大家又覺得新地會開甚麼價。
來源:
http://hk.apple.nextmedia.com/financeestate/art/20160815/19736574